हेग्या भाऊ (पिट हेगसेठ): महामहीम ट्रम्प जी, पायलट सुखरूप पोहोचतोय वॉशिंग्टनात. चिंता नसावी.
ट्रम्प तात्या : गुड!
हेग्या भाऊ : गुड फ्रायडेला सुटका झाली. गुहेत लपला होता रात्रभर. सकाळी त्याला सुखरूप बाहेर काढलं.
ट्रम्प तात्या : ते कसं...
हेग्या भाऊ : अहो तात्या, सॉरी महामहीम, शुक्रवारी इराणी लोकांनी विमानावर हल्लाबोल केला आणि विमान पाडलं.
ट्रम्प तात्या : शाब्बास. फुशारक्यांबद्दल.
हेग्या भाऊ : इराणी फार आक्रमक झालेत. तो काही करू शकला नाही त्यावेळी. गॉड सेवड हिज लाईफ. थॅन्क्स टू अलमायटी.
ट्रम्प तात्या : (उपहासाने) केक घेऊन या. सेलिब—ेशन करा. आता काय स्टेटस आहे?
हेग्या भाऊ : देव महान आहे. पायलटसहित सर्व सैनिक सुखरूप आहेत.
ट्रम्प तात्या : आरती करा. दिवे ओवाळून घ्या. (तात्या सिगारचा धूर सोडत उपहासाने)
हेग्या भाऊ : ते भारतीय संस्कृतीत आहे.
ट्रम्प तात्या : पण मला आवडेल ओवाळून घ्यायला. मस्त वाटेल.
हेग्या भाऊ : इंडियातून मागवूया का ती ओवाळेची प्लेट?
ट्रम्प तात्या : ओवाळेची प्लेट कशाला? आपल्या काचेच्या प्लेटमदी मेणबत्त्या लावा दोन. तसं ओवाळून टाका. हौशी आहेस तू पिट.
हेग्या भाऊ : थँक्स महामहीम; पण फक्त ओवळायचं असतं महामहीम आणि ठेेवून द्यायचं बाजूला.
ट्रम्प तात्या : ते शिकलो मी इंडियात. पुढे?
हेग्या भाऊ : (स्वगत) इंडियावरून ओवाळून टाका यांना म्हणजे युद्ध थांबेल.
ट्रम्प तात्या : काय बोलला समजले नाही.
हेग्या भाऊ : पायलटचे स्वागत करूया. त्यांचा पुनर्जन्मच झाला आहे असं म्हणतोय...
ट्रम्प तात्या : ते काही नाही. सगळं बाजूला ठेवा. आल्या आल्या त्यांना काम द्या. इराण नकाशावरून गायब झाला पाहिजे.
हेग्या भाऊ : पायलट आणि सैनिक गुड फ्रायडे ते इस्टर या तीन होलीडेजमध्ये सुरक्षित राहिले, हा अमेरिकेसाठी शुभसंकेत आहे.
ट्रम्प तात्या : याचा आनंदोत्सव झाला पाहिजे; पण इराणला संपवूनच.
हेग्या भाऊ : येस महामहीम. (असला येडा मोहीम फत्ते काय करणार?)
ट्रम्प तात्या : गेट लॉस्ट. तोंड वाकडं करून काय बोलतो आहे. मोहीम फत्ते करा. जा तयारीला लागा.
