साहित्य अकादमी बाल साहित्य पुरस्कारांची घोषणा, संगीता बर्वे यांना ‘पियूची वही’ कादंबरीसाठी पुरस्कार 

नवी दिल्ली, पुढारी वृत्तसेवा : प्रसिध्द लेखिका संगीता बर्वे यांना 'पियूची  वही' या कादंबरीकरिता मराठी भाषेसाठीचा 'साहित्य अकादमी बाल साहित्य पुरस्कार' बुधवारी (दि. २४ ऑगस्ट) जाहीर झाला आहे. साहित्य क्षेत्रातील सर्वोच्च संस्था म्हणून नाव लौकिक असणाऱ्या साहित्य अकादमीने आज २०२२ च्या बाल साहित्य पुरस्कारांची घोषणा केली. अकादमीचे अध्यक्ष डॉ चंद्रशेखर कंबार यांच्या अध्यक्षतेखाली झालेल्या कार्यकारी मंडळाच्या बैठकीत देशातील २२ प्रादेशिक भाषांसाठी  साहित्य अकादमी बाल साहित्य पुरस्कारांची  निवड व घोषणा करण्यात आली. या पुरस्कारांमध्ये कोकणी भाषेसाठी लेखिका ज्योती कुंकळकर यांच्या 'मयुरी' या कादंबरीस देखील बाल साहित्य पुरस्कार जाहीर झाला आहे.

भारत सासणे, प्रवीण बांदेकर आणि प्रेमानंद गज्वी या साहित्यिकांचा मराठी भाषेतील साहित्य अकादमी बाल साहित्य पुरस्कार निवडीच्या परिक्षक मंडळात समावेश होता. ५० हजार रुपये आणि ताम्रपत्र असे या पुरस्काराचे स्वरूप असून यावर्षी १४ नोव्हेंबर २०२२ या बालदिनी साहित्य अकादमीच्या विशेष कार्यक्रमात या पुस्काराचे वितरण करण्यात येईल.

व्यवसायाने डॉक्टर असलेल्या डॉ. संगीता बर्वे या उत्तम कवयित्री आणि बाललेखिका आहेत. 'मृगतृष्णा' आणि  'दिवसाच्या वाटेवरून' हे त्यांचे कवितासंग्रह प्रसिध्द आहेत. बर्वे यांची बाल लेखिका म्हणूनही वेगळी ओळख आहे. 'गंमत झाली भारी', 'झाडआजोबा', 'खारुताई आणि सावली', 'उजेडाचा गाव' हे त्यांचे मुलांसाठीचे कवितासंग्रह असून 'पियूची वही' ही कांदबरी विशेष प्रसिद्ध आहे. याच कादंबरीवर आधारित 'संगीत पियूची वही' हे बाल नाटयही त्यांनी लिहीले आहे. 'अदितीची साहसी सफर' या पुस्तकाचा त्यांनी अनुवाद केला आहे. यासोबतच, त्यांनी विविध विषयांवर ललित लेखनही केले आहे.

बर्वे यांच्या कवितासंग्रहांना महाराष्ट्र शासनाचा कविवर्य भा.रा.तांबे पुरस्कार, इंदिरा संत  योजनेंतर्गत उत्कृष्ट वाचन निर्मिती पुरस्कार, विशाखा पुरस्कार, कामगार साहित्य परिषदेचा ग. दि. माडगूळकर पुरस्कार, अनन्वय पुरस्कार असे अनेक पुरस्कार मिळाले आहेत.