पिंपरी : पिंपरीतील इमारतीच्या १५ व्या मजल्यावरून उडी मारून आत्महत्या केलेल्या तरुणीच्या मृत्यूचे कारण तब्बल दीड महिन्यानंतर समोर आले आहे. आत्महत्येपूर्वी तिने आपल्या मोबाईलमध्ये तीन व्हाईस मेसेज रेकॉर्ड करून ठेवले होते. ते मेसेज मित्र-मैत्रिणींना पाठवले होते. हे मेसेज तिच्या पालकांनी आणि पोलिसांनी ऐकले, त्यानंतर तिच्या वर्गमित्र असलेल्या आरोपीला अटक करण्यात आली आहे.
सहिती कलुगोटाला रेड्डी (२०, रा. वाकड) आत्महत्या केलेल्या तरुणीचे नाव आहे. या प्रकरणी कलुगोटाला रेड्डी यांनी वाकड पोलिस ठाण्यात फिर्याद दिली असून, पोलिसांनी प्रणव राजेंद्र डोंगरे (रा. आकुर्डी) याला अटक केली आहे. पोलिसांनी दिलेल्या माहितीनुसार, सहिती हिने ५ जानेवारी रोजी संध्याकाळी पावणेपाचच्या सुमारास राहत्या इमारतीच्या १५व्या मजल्यावरून उडी मारून आत्महत्या केली. ती आकुर्डी येथील डी. वाय. पाटील कॉलेज ऑफ इंजिनिअरिंगच्या तिसऱ्या वर्षात शिक्षण घेत होती.
सुरुवातीला या घटनेची अकस्मात मृत्यू म्हणून नोंद करण्यात आली होती. मात्र, सहितीच्या मित्र मैत्रिणींनी तिच्या कुटुंबीयांना माहिती दिल्यानंतर हा गुन्हा उघडकीस आला. मृत्यूपूर्वी सहितीने आपल्या मैत्रिणीला मोबाईलचा पासवर्ड आणि सोसायटीमधील एका मित्राचा नंबर शेअर केला होता.
यानंतर कुटुंबीयांनी तिचा मोबाईल अनलॉक केला असता, त्यामध्ये तिचे तीन व्हाइस मेसेज आढळले. या मेसेजमध्ये तिने आई-वडील, मित्र आणि प्रणव यांच्यासाठी वेगवेगळे रेकॉर्डिंग करून ठेवले होते.
सहिती आणि तिच्या वर्गमित्र प्रणव यांचे प्रेमसंबंध असल्याचे पोलिस तपासात समोर आले. मात्र, प्रणवने तिच्या प्रेमाचा गैरफायदा घेत वारंवार शारीरिक आणि मानसिक त्रास दिला. त्याच्या त्रासाला कंटाळून तिने आत्महत्या केली. पोलिसांनी प्रणव डोंगरेवर आत्महत्येस प्रवृत्त केल्याचा गुन्हा दाखल करून त्याला अटक केली आहे. वाकड पोलिस तपास करत आहेत.
