पिंपरी: माहिती तंत्रज्ञान (आयटी) कंपनीत नोकरीला असलेल्या एका व्यक्तीने विष प्राशन करून आत्महत्या केली. ही घटना चऱ्होली येथे घडली.
कुमार ऐश्वर्य (39, रा. चऱ्होली बुद्रुक) असे आत्महत्या केलेल्याचे नाव आहे. दिघी पोलिस ठाण्याचे निरीक्षक विनायक पाटील यांनी दिलेल्या माहितीनुसार, कुमार ऐश्वर्य हे खराडी येथील एका आयटी कंपनीत नोकरीला होते. त्यांनी 29 जानेवारी रोजी विष प्राशन केले. त्यानंतर त्यांना रुग्णालयात दाखल करण्यात आले. उपचारादरम्यान रविवारी (दि. 1) रात्री साडेदहाच्या सुमारास त्यांचा मृत्यू झाला.
पोलिसांनी दिलेल्या माहितीनुसार, कुमार ऐश्वर्य यांची पत्नी प्रीती ऐश्वर्य या रिअल इस्टेटचे काम करतात. त्यांच्यावर ठाण्यामध्ये गुन्हा दाखल झाला होता. त्यामुळे कुमार हे तणावात होते. त्यातून आलेल्या नैराश्यातून कुमार ऐश्वर्य यांनी टोकाचे पाऊल उचलत विष प्राशन केले, असा प्राथमिक अंदाज व्यक्त केला जात आहे. तपास दिघी पोलिस करत आहेत.
आत्महत्येचे कारण अद्याप स्पष्ट झालेले नाही. कुमार यांच्या पत्नीवर ठाणे येथे गुन्हा दाखल करण्यात आला आहे. याप्रकरणी संबंधितांचे जबाब नोंदणी करण्यात येत असून तपास सुरू आहे.
विनायक पाटील, पोलिस निरीक्षक, दिघी पोलिस ठाणे
