पिंपरी: पिंपरी-चिंचवड महापालिकेच्या दैनंदिन कामकाजामध्ये मराठी भाषेचा वापर व्हावा. महापालिकेचा व्यवहार अधिक सोपा, सुटसुटीत व अर्थपूर्ण भाषेत व्हावा, या उद्देशाने एम. ए. मराठी उत्तीर्ण कर्मचाऱ्यांना दोन विशेष वेतनवाढ देण्याचा ठराव विधी समितीच्या विशेष बैठकीत करण्यात आला आहे. ता ठराव अंतिम मंजुरीसाठी महापालिका सर्वसाधारण सभेसमोर ठेवण्यात येणार आहे.
विधी समितीची बैठक सभापती सुजाता बोराटे यांच्या अध्यक्षतेखाली पार पडली. बैठकीला समितीचे सदस्य ज्ञानेश्वर जगताप, कुशाग्र कदम, वर्षा जगताप, तुषार सहाणे, कुंदा भिसे, शेखर चिंचवडे, सहआयुक्त मनोज लोणकर, उपायुक्त राजेश आगळे आदी उपस्थित होते.
मराठी भाषेला नवतंत्रज्ञानाने सुसज्ज करणे, सर्वसामान्यांना समजेल अशी प्रशासकीय मराठी विकसित करणे. बोली भाषांचे जतन व संवर्धन करणे, या उद्दिष्टांच्या पूर्ततेसाठी शासनामार्फत विविध शिफारशी करण्यात आलेल्या आहेत. त्या अनुषंगाने विधी समितीने एम.ए. मराठी उत्तीर्ण कर्मचाऱ्यांना दोन विशेष वेतनवाढ देण्याचा ठराव केला आहे.
