पिंपरी: भारतीय रेल्वे आणि वन विभागात सरकारी नोकरी लावण्याचे आमिष दाखवून तिघांची २१ लाख ८७ हजार रुपयांची फसवणूक केल्याप्रकरणी दोघांवर गुन्हा दाखल करण्यात आला आहे. ही घटना एप्रिल २०२३ मध्ये काळेवाडी येथे घडली.
विक्रम पवार (रा. डांबरीतांडा, जि. जालना) आणि निलेश वाकचौरे (रा. संगमनेर, जि. अहिल्यानगर) यांच्याविरोधात काळेवाडी पोलिस ठाण्यात गुन्हा दाखल करण्यात आला आहे. हितेश सुरेश कुलकर्णी (३५, रा. सुसगाव, पुणे) यांनी फिर्याद दिली आहे.
पोलिसांनी दिलेल्या माहितीनुसार, आरोपींनी फिर्यादी हितेश कुलकर्णी तसेच अंकुश राठोड आणि प्रशांत जाधव यांना सरकारी नोकरी लावण्याचे आमिष दाखवले. त्यासाठी त्यांच्याकडून टप्प्याटप्प्याने २१ लाख ८७ हजार ७३ रुपये घेतले.
त्यानंतर तिघांनाही रेल्वे आणि वन विभागातील बनावट नियुक्तीपत्रे व अन्य कागदपत्रे देण्यात आली. संबंधित कागदपत्रे खोटी असल्याचे निष्पन्न झाल्यानंतर फसवणुकीचा प्रकार उघडकीस आला. यानंतर संबंधितांना पोलिसांकडे धाव घेतली. या घटेनचा पुढील तपास काळेवाडी पोलिस करीत आहेत.
