पिंपरी : पुढारी वृत्तसेवा
उपमुख्यमंत्री तथा पालकमंत्री अजित पवार यांनी पिंपरी-चिंचवड पोलिस आयुक्तालयामध्ये कोणकोणती कामे झाली आहेत, पोलिस ठाण्यांच्या इमारती, पोलिस भरती, वाहनांची संख्या, गुन्ह्यांची संख्या या सर्व गोष्टींचा आढावा घेतला.
त्यानंतर पोलिस आयुक्तांचे अभिनंदन करून पिंपरी- चिंचवडकरांना अभिमान वाटणारे काम करत राहण्याचा सल्ला दिला. जिल्हा नियोजन समितीच्या (डीपीसी) निधीतून पिंपरी-चिंचवड पोलिस आयुक्तालयाला ५७ चारचाकी वाहने उपलब्ध करून देण्यात आली आहेत. या वाहनांचे लोकार्पण उपमुख्यमंत्री अजित पवार यांच्या हस्ते बुधवारी (दि. ९) करण्यात आले.
पोलिस आयुक्त विनयकुमार चौबे यांच्या 'स्थायी आदेश' या पुस्तकाचे प्रकाशन अजित पवार यांच्या हस्ते करण्यात आले. या वेळी खासदार श्रीरंग बारणे, आमदार अण्णा बनसोडे, अश्विनी जगताप, पोलिस आयुक्त विनयकुमार चौबे, महापालिका आयुक्त शेखर सिंह, सहआयुक्त शशिकांत महावरकर,
अपर पोलिस आयुक्त वसंत परदेशी, पोलिस उपायुक्त संदीप डोईफोडे, शिवाजी पवार, स्वप्ना गोरे, माधुरी कांगणे आदी उपस्थित होते. कार्यक्रमादरम्यान उपमुख्यमंत्री अजित पवार यांना पोलिस आयुक्त चौबे यांनी पीपीटीच्या माध्यमातून कामाची माहिती दिली. मागील दोन वर्षांत पोलिस आयुक्तालयात कोणती कामे झाली,
किती पोलिस ठाण्यांना नवीन इमारती मिळाल्या, सीएसआर फंडातून कोणती कामे झाली, गुन्ह्यांचा आढावा, एमआयडीसीतील पोलिसांचे उपक्रम, वाहतूक समस्या सोडविण्यासाठी केलेले प्रयत्न या सर्व गोष्टींची माहिती देण्यात आली. पवार यांनी पोलिसांच्या कामाचा आढावा घेतल्यानंतर पोलिस आयुक्त चौबे यांचे कौतुक केले; तसेच लोकांना अभिमान वाटेल असेच काम करत रहा, असा सल्लाही दिला.
पोलिस आयुक्तालयासाठी चिखली येथे १५ एकर जागा
पोलिसांच्या निवासस्थानासाठी वाकड येथे नऊ एकर जागा बावधन, संत तुकारामनगर, काळेवाडी, दापोडी अशा चार पोलिस ठाण्यांना मंजुरी
पोलिस आयुक्तालय इमारत आराखड्यास मंजुरी
पिंपरी पोलिस ठाणे आणि २०० निवासांसाठी निधी मंजूर
आळंदी पोलिस ठाण्याच्या नवीन इमारतीचा आराखडा मंजूर
महाळुंगे पोलिस ठाण्यासाठी सीएसआर फंडातून १६ कोटींचा निधी
काही दिवसांपूर्वी पुण्यातील बोपदेव घाटात एका तरुणीवर सामूहिक बलात्कार झाल्याची घटना घडली. या पार्श्वभूमीवर पिंपरी-चिंचवड शहरात महिलांच्या सुरक्षिततेसाठी पोलिसांनी काय उपाययोजना केल्या आहेत, याची माहिती पवार यांना देण्यात आली.
पोलिस आयुक्तालयाला मिळालेल्या ५७ वाहनांचे 66 लोकार्पण उपमुख्यमंत्री अजित पवार यांच्या हस्ते करण्यात आले. उपमुख्यत्र्यांनी पोलिस आयुक्तालायाच्या कामकाजाचा आढावा घेतला. त्यानंतर पोलिसांच्या कामाचे त्यांनी कौतुक केले. तसेच, काही गोष्टींमध्ये विशेष लक्ष देण्याच्या सूचना केल्या आहेत.
विनय कुमार चौबे, पोलिस आयुक्त, पिंपरी-चिंचवड
