साबरकांठा; वृत्तसंस्था : गुजरातमधील साबरकांठा जिल्ह्यातील माजरा गावात शुक्रवारी रात्री दोन गटांमध्ये हिंसाचार झाला. या हिंसाचारात सुमारे 10 जण जखमी झाले. तीस वाहने जाळण्यात आली आणि अनेक घरांची तोडफोड करण्यात आली. पोलिसांनी आतापर्यंत 20 जणांना ताब्यात घेतले आहे. गावात मोठा पोलिस बंदोबस्त तैनात करण्यात आला आहे. शांतता आणि सुव्यवस्था राखण्यासाठी पोलिसांनी ध्वज संचलनही केले.
साबरकांठा डीएसपी अतुल पटेल यांनी सांगितले की, माजरा गावात एका धार्मिक कार्यक्रमावरून दोन गटांमध्ये शुक्रवारी रात्री 10.30 वाजण्याच्या सुमारास दोन गटांमध्ये झालेल्या वादाचे पर्यवसन हिंसाचारात झाले. दोन्ही गटांकडून दगडफेक आणि जाळपोळ करण्यात आली. सुमारे 110 ते 120 जणांविरुद्ध गुन्हा दाखल करण्यात आला आहे. हा हिंसाचार जुन्या वैमनस्यातून झाल्याचे मानले जात आहे.
दंगलखोरांनी गावातील मालमत्तेचे मोठ्या प्रमाणात नुकसान केले आणि अनेक वाहने पेटवून दिली. अनेक घरांची तोडफोडही करण्यात आली. हिंसाचारात कोट्यवधी रुपयांच्या मालमत्तेचे नुकसान झाले. हिंसक घटनेची तीव्रता लक्षात घेता, जिल्हा पोलिसांनी तत्काळ कारवाई केली आणि गावात मोठा पोलिस बंदोबस्त तैनात केला. पोलिसांनी तोडफोड आणि हिंसाचारात सहभागी असलेल्या समाजकंटकांविरुद्ध गुन्हा दाखल केला आहे आणि सीसीटीव्ही फुटेजच्या आधारे त्यांची अटक केली जात आहे. सध्या परिस्थिती नियंत्रणात असली, तरी तणावपूर्ण आहे.
