स्वदेशी बनावटीचे तीन परम महासंगणक देशसेवेत रूजू

नवी दिल्ली ः पुढारी वृत्तसेवा

पंतप्रधान नरेंद्र मोदी यांनी गुरुवारी 130 कोटी रुपयांच्या स्वदेशी बनावटीच्या तीन ‘परम रुद्र’ महासंगणकांचे लोकार्पण केले. हे महासंगणक पुणे, दिल्ली आणि कोलकाता येथे ठेवण्यात येणार आहेत. राष्ट्रीय महासंगणकीय प्रणालीअंतर्गत वैज्ञानिक आणि तांत्रिक प्रगतीसाठी हे महत्त्वाचे पाऊल आहे. हे तिन्ही महासंगणक स्वदेशी तंत्रज्ञानावर विकसित करण्यात आले आहेत. अनेक वैज्ञानिक विषयांमध्ये अत्याधुनिक संशोधनासाठी या संगणकांचा वापर होणार आहे. दूरद़ृश्य प्रणालीद्वारे पंतप्रधान नरेंद्र मोदींनी कार्यक्रमाला संबोधित केले. ते म्हणाले की, ‘परम रुद्र’ महासंगणक, भारत संगणकीय क्षेत्रात स्वावलंबी होण्याच्या दिशेने महत्त्वपूर्ण पाऊल आहे. संगणकीय क्रांतीत आपल्या देशाचे योगदान बिट, बाईटस्मध्ये नसून टेराबाईटस् आणि पेटाबाईटस्मध्ये असले पाहिजे. त्यामुळे आपण योग्य दिशेने, योग्य गतीने वाटचाल करत आहोत, हे या यशामुळे सिद्ध होते.

यंदाच्या अर्थसंकल्पात संशोधन निधीसाठी 1 लाख कोटी रुपयांची तरतूद करण्यात आल्याचे पंतप्रधानांनी सांगितले. भारताने वैज्ञानिक शोधात जागतिकस्तरावर आघाडी घेतली पाहिजे. अंतराळ क्षेत्र हे याचे प्रमुख उदाहरण आहे, जिथे भारत एक मोठी शक्ती म्हणून उदयास आला असल्याचे त्यांनी सांगितले. विज्ञान-तंत्रज्ञान, आरोग्य आणि अवकाश संशोधन क्षेत्रासाठी या महासंगणकांचा उपयोग होणार आहे.

• हवामान, पर्यावरणीय बदलासाठी वापर

• कृषी, आपत्ती निवारणासाठी उपयुक्त

• विज्ञानासह अभियांत्रिकीच्या विज्ञानास बळ