तमिळनाडू विधानसभेच्या २३४ जागांसाठी झालेल्या ऐतिहासिक निवडणुकीचा आज फैसला होत असून सकाळी ८ वाजल्यापासून मतमोजणीला सुरुवात झाली आहे. सुरूवातीच्या कलानुसार तमिळनाडूमध्ये डीएमके पुन्हा एकदा सत्ता राखण्याच्या दिशेने कूच करत आहे. मात्र विजय थलापती यांचा टीव्हीकेने मोठी मुसंडी मारत राज्यातील दुसऱ्या क्रमांकाचा पक्ष म्हणून प्रस्थापित होण्याच्या दिशेने वाटचाल सुरू केली आहे.
राज्याच्या इतिहासातील सर्वाधिक ८५.१ टक्के मतदानानंतर आज मुख्यमंत्री एम.के. स्टालिन यांच्या नेतृत्वाखालील 'डीएमके' (DMK) पुन्हा सत्तेवर येणार की अभिनेता विजय यांच्या 'टीव्हीके' (TVK) या नव्या पक्षाचा करिष्मा चालणार, याकडे संपूर्ण देशाचे लक्ष लागले आहे.
हिंदी भाषा सक्तीवरून द्रविडी अस्मितेला पुन्हा एकदा हवा या निवडणुकीत मिळाली आहे. त्याचबरोबर डिलीमिटेशनच्या मुद्द्यावरून दक्षिण विरूद्ध उत्तर असा देखील सामना रंगताना दिसत आहे. या सर्व पार्श्वभूमीवर तमिळ नाडूमधील राजकारण कोणतं वळण घेतं हे पाहणं उत्सुकतेचं ठरणार आहे. सत्ताधारी डीएमके आघाडी, अण्णा द्रमुक (AIADMK) आणि टीव्हीके यांच्यातील या अटीतटीच्या तिरंगी लढतीत सुरुवातीच्या कलांमध्ये कोण बाजी मारणार आणि दक्षिण भारताच्या राजकारणाची दिशा काय असणार, याचे क्षणोक्षणीचे अपडेट्स पाहा फक्त येथे.
