नवी दिल्ली : जम्मू-काश्मीरमधील फुटीरतावादी नेता यासिन मलिक याच्याशी संबंधित खटल्यावर सर्वोच्च न्यायालयात गुरुवारी सुनावणी झाली. हे प्रकरण जम्मूहून नवी दिल्लीला हस्तांतरित करण्याशी संबंधित आहे. सीबीआयने ही याचिका दाखल केली होती.
यावर न्यायमूर्ती अभय एस. ओका आणि न्यायमूर्ती ऑगस्टिन जॉर्ज मसिह यांच्या खंडपीठाने मलिक आणि इतर आरोपींना नोटीस बजावली. नोटीसवर १८ डिसेंबरपर्यंत उत्तर दाखल करण्याचे निर्देश दिले.
सुनावणीदरम्यान सॉलिसिटर जनरल तुषार मेहता यांनी खंडपीठाला सांगितले की, तिहार तुरुंगात व्हिडिओ कॉन्फरन्सिंग सुविधेसह न्यायालय असल्याने अपहरण प्रकरणातील खटल्यासाठी मलिकला जम्मू न्यायालयात प्रत्यक्ष हजर राहण्याची गरज नाही. यापूर्वी २१ नोव्हेंबर रोजी झालेल्या शेवटच्या सुनावणीत न्यायालयाने म्हटले होते की, जर दहशतवादी अजमल कसाबवर निष्पक्ष खटला होऊ शकतो, तर यासिन मलिक का नाही. याप्रकरणी पुढील सुनावणी १८ डिसेंबरला होणार आहे.
