Dharmasthala case update
पुढारी ऑनलाईन डेस्क : कर्नाटकमधील धर्मस्थळ या मंदिरनगरीत सुरु असलेल्या कथित सामूहिक दफनप्रकरणी तपासात मोठी प्रगती झाली आहे. तपास यंत्रणांनी सहाव्या संशयित ठिकाणी खोदकाम करत असताना अर्धवट सांगाडा (skeletal remains) आढळून आला आहे. या ठिकाणी मानव सांगाड्याचे अवशेष सापडले असून, ही पहिलीच वेळ आहे की कोणत्याही जागेवर पुरावे मिळाले आहेत.
कर्नाटकातील धर्मस्थळ या मंदिरनगरीत एका माजी स्वच्छता कर्मचाऱ्याने गंभीर आरोप केले आहेत की, 1998 ते 2014 या काळात त्याला काही मृतदेह — मुख्यतः महिला आणि अल्पवयीन मुलांचे गुपचूप दफन करण्यास किंवा जाळण्यास भाग पाडण्यात आले. त्याच्यावर त्यासाठी जबरदस्ती केली गेली होती. तो हे मृतदेह येथील विविध जागांवर गुप्तपणे दफन करत होता.
या मृतदेहांवर अनेक वेळा लैंगिक अत्याचाराचीही चिन्हे असल्याचे सांगितले जात आहे. या आरोपानंतर पोलिसांनी आणि विशेष तपास पथकाने (SIT) अनेक ठिकाणांवर खोदकाम करून पुरावे शोधण्यास सुरुवात केली. आतापर्यंतच्या तपासात सहाव्या ठिकाणी अर्धवट सांगाडा आढळला आहे, ज्यामुळे या प्रकरणाला मोठा वळण मिळाले आहे.
पोलिस सूत्रांच्या माहितीनुसार, आढळलेले सांगाडा एका पुरुषाचा असावा, असा प्राथमिक अंदाज आहे. हे अवशेष आता तपासणीसाठी न्यायवैद्यक प्रयोगशाळेत (forensic lab) पाठवण्यात आले आहेत. तपास करणाऱ्या विशेष तपास पथकाने (SIT) व अँटी-नक्सल फोर्स (ANF) च्या पथकाने या ठिकाणी खोदकाम करताना या सांगाड्याचा शोध लावला.
सहाव्या स्थळी मिळालेला सांगाडा खूपच विघटित अवस्थेत आहे. त्यामुळे वेळ व पर्यावरणीय कारणांमुळे हाडं विखुरलेली असण्याची शक्यता तपास यंत्रणांनी वर्तवली आहे. याठिकाणी श्वान पथक देखील बोलावण्यात आले आहे, जेणेकरून आणखी पुरावे शोधता येतील.
तसेच, या ठिकाणी दोघांचे मृतदेह पुरण्यात आल्याचा दावा व्हिसलब्लोअरने केला होता, त्या दृष्टीने तपास सुरू आहे. सांगाड्याशिवाय दोरी, कपडे, एक प्रिंटर आणि लॅपटॉप देखील पुरावा म्हणून जप्त करण्यात आले आहेत.
या प्रकरणात एकूण 15 ठिकाणांची ओळख पटवण्यात आली आहे, मात्र सुरुवातीचे पाच ठिकाणी कोणतेही सांगाडे किंवा मृतदेहांचे अवशेष आढळले नव्हते. विशेषतः नेंत्रावती नदीच्या काठी असलेल्या पहिल्या ठिकाणी खोदकामात पाण्याचा अडथळा आला, पण काही सापडलं नाही.
8 ठिकाणं नेंत्रावती नदीच्या काठी
9 ते 12 क्रमांकाच्या जागा महामार्गालगत
13 व्या क्रमांकाची जागा नेंत्रावती ते आजुकुरी मार्गावर
14 व 15 क्रमांकाच्या जागा कन्याडी भागात महामार्गाजवळ
सहाव्या स्थळी सापडलेल्या सांगाड्यामुळे तपासाला नवे वळण मिळाले आहे. हे पुरावे व्हिसलब्लोअरच्या आरोपांना बळकटी देतात की नाही, हे आता न्यायवैद्यक तपासणीतून स्पष्ट होणार आहे. या प्रकरणात आणखी जागांवर तपास, खोदकाम आणि पुराव्यांचे संकलन लवकरच होणार आहे.
धर्मस्थळसारख्या धार्मिक व ऐतिहासिक महत्त्वाच्या ठिकाणी असे गंभीर आरोप झाल्याने संपूर्ण राज्यभरात खळबळ उडाली आहे. यातील सत्य परिस्थिती काय आहे, हे उलगडणे सामाजिकदृष्ट्या तसेच न्यायाच्या दृष्टीने अत्यावश्यक ठरणार आहे.
