नवी दिल्ली, पुढारी वृत्तसेवा : शिवसेना शिंदे गटाच्या सर्व खासदारांनी पंतप्रधान नरेंद्र मोदी यांची सोमवारी भेट घेतली. केंद्राच्या आगामी अर्थसंकल्पात महाराष्ट्र राज्याला भरघोस निधी देण्याची मागणी या खासदारांनी पंतप्रधानांकडे केली.
राज्यात नुकत्याच झालेल्या अर्थसंकल्पात महायुती सरकारने घेतलेल्या निर्णयांची माहिती देखील शिंदे गटाच्या खासदारांनी पंतप्रधान मोदी यांना दिली. महाराष्ट्रातील विविध प्रश्नांबाबत यावेळी चर्चा झाली. यावेळी विठ्ठल रुक्मिणीची मूर्ती पंतप्रधानांना भेट स्वरुपात देण्यात आली.
या भेटीदरम्यान, केंद्रीय आरोग्य राज्यमंत्री प्रतापराव जाधव, खासदार डॉ. श्रीकांत शिंदे, खासदार श्रीरंग बारणे, खासदार धैर्यशील माने, खासदार संदिपान भुमरे, खासदार रविंद्र वायकर, खासदार नरेश म्हस्के, खासदार मिलिंद देवरा यांच्यासह राष्ट्रवादी कॉंग्रेस अजित पवार गटाचे खासदार सुनील तटकरे आदी उपस्थित होते.