Rise in AC Explosion Incidents: Former IAS Officer Dies in House Fire in Delhi Avoid 'These' 5 Mistakes...
पुढारी ऑनलाईन :
दिल्लीतील हौज खास परिसरात एका माजी IAS अधिकाऱ्यांच्या घरात एसीचा स्फोट झाल्याने भीषण आग लागली. उपचारादरम्यान त्या माजी IAS अधिकाऱ्यांचा मृत्यू झाला. गेल्या एका महिन्यात दिल्लीमध्ये एसीमुळे जीवितहानी झालेली ही दुसरी मोठी दुर्घटना आहे. यापूर्वी विवेक विहार येथे एसीमुळे लागलेल्या आगीत ९ जणांचा मृत्यू झाला होता. चला जाणून घेऊया, एसी वापरताना कोणत्या ५ धोकादायक चुका टाळल्या पाहिजेत.
दिल्लीमध्ये पुन्हा एकदा एसीच्या स्फोटामुळे घराला आग लागल्याची घटना समोर आली आहे. या दुर्घटनेत देशाचे माजी CCI चेअरमन आणि वरिष्ठ IAS अधिकारी धनेंद्र कुमार यांचा मृत्यू झाला. ही घटना २७ मेच्या मध्यरात्री घडली. यापूर्वी विवेक विहार येथे एसीमुळे लागलेल्या भीषण आगीत ९ जणांचा जीव गेला होता.
हौज खास पोलिस ठाण्यात रात्री सुमारे ११ वाजून १८ मिनिटांनी PCR कॉल आला. एका घराला आग लागल्याची माहिती मिळताच पोलिस आणि अग्निशमन दल घटनास्थळी पोहोचले. दोन फायर टेंडर्सच्या मदतीने आग आटोक्यात आणण्यात आली.
आग लागली तेव्हा घरात एकूण पाच जण उपस्थित होते, ज्यामध्ये घरातील नोकरांचाही समावेश होता. सर्वांना रुग्णालयात दाखल करण्यात आले. त्यापैकी ८० वर्षीय माजी IAS अधिकारी धनेंद्र कुमार यांचा उपचारादरम्यान मृत्यू झाला.
एसीच्या इनडोअर युनिटमध्ये झाला स्फोट
प्राथमिक तपासात पोलिसांनी सांगितले की, एसीच्या इनडोअर युनिटमध्ये स्फोट झाल्याने घरात आग लागली आणि काही वेळातच ती संपूर्ण घरात पसरली.
दिल्ली-NCR मध्ये अनेक घटना
दिल्ली, गाझियाबादसह देशातील अनेक भागांमध्ये एसीमुळे आग लागण्याच्या घटना समोर आल्या आहेत. उन्हाळ्यात घर, दुकान, कार्यालय अशा ठिकाणी एसीचा मोठ्या प्रमाणात वापर केला जातो. एसी हे उच्च व्होल्टेजवर चालणारे उपकरण असल्याने छोटीशी चूकही जीवघेणी ठरू शकते.
एसी वापरताना ‘या’ ५ चुका टाळा
एसीला आग का लागते आणि ती कशी टाळता येईल, हे जाणून घेऊया.
एसी सतत चालू ठेवू नका
एसी हे उच्च व्होल्टेजवर चालणारे उपकरण आहे. अनेकजण उकाड्यापासून आराम मिळवण्यासाठी एसी २४ तास सतत चालू ठेवतात. मात्र, हे अत्यंत धोकादायक ठरू शकते. काही तासांच्या अंतराने एसी बंद करून त्याला विश्रांती द्यावी.
इलेक्ट्रिक शॉर्ट सर्किट टाळा
एसीला आग लागू नये यासाठी शॉर्ट सर्किटपासून बचाव करणे आवश्यक आहे. वायरमध्ये अतिरिक्त जोड (जॉइंट) टाळा आणि शक्यतो एकसंध वायर वापरा. वायर गरम होणे किंवा जॉइंट सैल होणे यामुळे शॉर्ट सर्किटचा धोका वाढतो आणि त्यामुळे आग लागू शकते.
व्होल्टेज फ्लक्चुएशन आणि ओव्हरलोडिंग
एसीमध्ये आग लागण्यामागचे एक मोठे कारण म्हणजे व्होल्टेज फ्लक्चुएशन. त्यामुळे केवळ एसी खराब होत नाही, तर आग लागण्याचाही धोका निर्माण होतो. ही आग संपूर्ण घराचे नुकसान करू शकते.
एसीची नियमित स्वच्छता आणि देखभाल न करणे
एसीची योग्य देखभाल न झाल्यास त्यात धूळ, माती आणि कचरा साचतो. यामुळे एसी ओव्हरहिट होऊन आग लागण्याची शक्यता वाढते. त्यामुळे एसीची नियमित सर्व्हिसिंग करणे गरजेचे आहे.
निकृष्ट दर्जाचे पार्ट्स वापरणे
एसी दुरुस्तीदरम्यान कमी दर्जाचे पार्ट्स किंवा निकृष्ट टेप वापरल्यास आग लागण्याचा धोका वाढतो. त्यामुळे एसीची दुरुस्ती नेहमी कंपनीच्या अधिकृत तंत्रज्ञांकडूनच करून घ्यावी.
