नवी दिल्ली: केंद्र सरकारने 'पीएम केअर्स' निधीची माहिती मंगळवारी सार्वजनिक केली. या निधीत एकूण ८ हजार ४५२ कोटी रुपये रक्कम शिल्लक असल्याचे जाहीर करण्यात आले. 'पीएम केअर्स' निधीला २०२४-२५ या आर्थिक वर्षात ४७९.०६ कोटी रुपयांच्या देशांतर्गत देणग्या मिळाल्या; ही रक्कम मागील वर्षाच्या तुलनेत सुमारे ३० टक्क्यांनी कमी आहे. तथापि, या निधीचे एकूण उत्पन्न वाढून १,२७९.९ कोटी रुपये झाले, जी मागील वर्षाच्या तुलनेत ४१ टक्क्यांची वाढ आहे.
या निधीत मिळणाऱ्या देशांतर्गत देणग्यांचे प्रमाण २०२४-२५ या आर्थिक वर्षात घटून ४७९.०५ कोटी रुपयांवर आले, जे २०२३-२४ मध्ये ६८१.८१ कोटी रुपये होते. याच कालावधीत विदेशी देणग्यांचे प्रमाणही ११.३५ लाख रुपयांवरून ९.२८ लाख रुपयांपर्यंत खाली आले.
दरम्यान, केंद्र सरकारने दिलेल्या माहितीनुसार, 'पीएम केअर्स' निधी हा सार्वजनिक आरोग्य आणीबाणी आणि इतर आपत्तींच्या काळात मदतकार्याला सहकार्य करण्यासाठी मार्च २०२० मध्ये स्थापन केलेला एक सार्वजनिक धर्मादाय ट्रस्ट आहे. या निधीचे अध्यक्षपद पंतप्रधान भूषवतात आणि याला पूर्णपणे ऐच्छिक देणग्यांमधून निधी प्राप्त होतो.
फंडाच्या एकूण शिल्लक रकमेपैकी जवळपास ९३ टक्के रक्कम म्हणजेच ७,८४६.६५ कोटी रुपये मुदत ठेवींमध्ये गुंतवलेली आहे. या मुदत ठेवींमधून मिळालेले ४६९.३८ कोटी रुपयांचे व्याज हे या फंडाच्या उत्पन्नाचे सर्वात मोठे स्रोत ठरले.
'पीएम केअर्स' फंडाच्या केवळ ०.१% रक्कम खर्च
२०२४-२५ या आर्थिक वर्षात पीएम केअर्स फंडाद्वारे करण्यात आलेला एकूण खर्च ८७.८५ लाख रुपये इतका होता, तर त्याआधीच्या आर्थिक वर्षात हा खर्च १५.६० कोटी रुपये होता. या आकडेवारीवरून असे दिसून येते की, २०२४-२५ या आर्थिक वर्षात एकूण जमा रकमेत वाढ झाली असली तरी देशांतर्गत आणि परदेशी अशा दोन्ही स्रोतांकडून मिळणाऱ्या देणग्यांमध्ये घट झाली आहे; तसेच, मुदत ठेवींमधून मिळालेले व्याज हे फंडाच्या उत्पन्नाचा सर्वात मोठा हिस्सा ठरले आहे.
