Operation Sindoor
नवी दिल्ली : पहलगाम घटनेनंतर, भारतात पाकिस्तानी वस्तू विकणे हा गुन्हा मानला गेला आहे. भारताने पाकिस्तानसोबतच्या व्यापारावर पूर्णपणे बंदी घातली आहे. असे असूनही, ई-कॉमर्स प्लॅटफॉर्मवर पाकिस्तानी ध्वज उघडपणे विकला जात आहे. हे लक्षात घेता सरकारने कठोर पावले उचलली आहेत. अशा कंपन्यांना सरकारने नोटीस बजावली आहे.
केंद्रीय ग्राहक संरक्षण प्राधिकरणाने (CCPA) पाकिस्तानी झेंडे आणि संबंधित वस्तूंच्या विक्रीवरून अमेझॉन इंडिया आणि फ्लिपकार्टसह अनेक प्रमुख ई-कॉमर्स प्लॅटफॉर्मना नोटिसा बजावल्या आहेत. भारतीय ऑनलाइन बाजारपेठांमध्ये अशा वस्तूंच्या उपलब्धतेबद्दल वाढत्या चिंतेनंतर ही कारवाई करण्यात आली आहे.
केंद्रीय ग्राहक व्यवहार मंत्री प्रल्हाद जोशी यांनी भारतीय प्लॅटफॉर्मवर पाकिस्तानी वस्तूंची विक्री 'असंवेदनशील' असल्याचे म्हटले आहे. ते म्हणाले की, हे राष्ट्रीय भावनेचे उल्लंघन आहे. त्यांनी जाहीर केले की मंत्रालयाने सर्व संबंधित प्लॅटफॉर्मना ही यादी तात्काळ काढून टाकण्याचे निर्देश दिले आहेत.
सोशल मीडिया साइट 'एक्स' वर पोस्ट करताना त्यांनी म्हटले आहे की, सीसीपीएने पाकिस्तानी झेंडे आणि संबंधित वस्तू विकल्याबद्दल अमेझॉन इन, फ्लिपकार्ट, यु बॉयइंडिया, एट्सी, द फ्लॅग कंपनी आणि द फ्लॅग कॉर्पोरेशन यांना नोटीस बजावली आहे. केंद्रीय मंत्र्यांनी म्हटले आहे की अशी असंवेदनशीलता खपवून घेतली जाणार नाही. ई-कॉमर्स प्लॅटफॉर्मला अशी सर्व सामग्री त्वरित काढून टाकण्याचे आणि राष्ट्रीय कायद्यांचे पालन करण्याचे निर्देश देण्यात आले आहेत.
कन्फेडरेशन ऑफ ऑल इंडिया ट्रेडर्स (CAIT) ने केंद्रीय मंत्री पियुष गोयल आणि प्रल्हाद जोशी यांना पत्र लिहिल्यानंतर ग्राहक प्राधिकरणाची ही कारवाई करण्यात आली. प्रमुख व्यासपीठांवर पाकिस्तानी ध्वज आणि पाकिस्तानचे राष्ट्रीय प्रतीक असलेले मग आणि टी-शर्ट यासारख्या वस्तूंच्या विक्रीबद्दल CAIT ने चिंता व्यक्त केली. कॅटचे राष्ट्रीय अध्यक्ष बीसी भरतिया यांनी पियुष गोयल यांना लिहिलेल्या पत्रात म्हटले आहे की, अमेझॉन आणि फ्लिपकार्ट सारख्या प्रमुख ई-कॉमर्स प्लॅटफॉर्मवर पाकिस्तानी झेंडे, लोगो असलेले मग आणि टी-शर्ट उघडपणे विकले जात आहेत. ते आपल्या राष्ट्रीय भावनेच्या आणि सार्वभौमत्वाच्या गाभ्यावर आघात करते.
