पुढारी ऑनलाईन डेस्क : छत्तीसगडमधील अबुजमढमध्ये नक्षलवादी आणि सुरक्षा दलांमध्ये चकमक झाली आहे. या चकमकीत 4 नक्षलवाद्यांचा खात्मा करण्यात आला. मात्र, यामध्ये एका जवानालाही वीरगती प्राप्त झाली. यावेळी घटनास्थळावरून अनेक शस्त्रेही जप्त करण्यात आली आहेत. त्यामध्ये एके-47 रायफलसह अनेक शस्त्रे जप्त करण्यात आली आहेत.
अधिकाऱ्यांनी दिलेल्या माहितीनुसार, चकमकीत जिल्हा राखीव गार्ड (DRG) चा एक हेड कॉन्स्टेबल शहीद झाला. नारायणपूर आणि दंतेवाडा जिल्ह्यांच्या सीमेवरील दक्षिण अबुझमद जंगलात शनिवारी (दि.4) संध्याकाळी सुरक्षा जवानांचे संयुक्त पथक नक्षलविरोधी मोहिमेवर असताना चकमक सुरू झाली. शनिवारी रात्री उशिरा गोळीबार थांबल्यानंतर, घटनास्थळावरून चार नक्षलवाद्यांचे मृतदेह आणि एके-47 रायफल आणि सेल्फ-लोडिंग रायफल (एसएलआर) यासह स्वयंचलित शस्त्रे जप्त करण्यात आली, असे त्यांनी सांगितले.
