पुढारी ऑनलाईन डेस्क : मुंबईतील 26/11 हल्ल्याच्या मास्टरमाईंड तहव्वूर हुसेन राणा याला आज भारतात आणले जात आहे. त्यांच्याविरुद्धच्या प्रकरणात राष्ट्रीय तपास संस्थेच्या (NIA) वतीने खटला चालवण्यासाठी नरेंद्र मान यांची विशेष सरकारी वकील म्हणून नियुक्ती करण्यात आली आहे. गृह मंत्रालयाने ९ एप्रिल रोजी प्रसिद्ध केलेल्या अधिसूचनेनुसार, राष्ट्रीय तपास संस्था अंतर्गत देण्यात आलेल्या अधिकारांचा वापर करत, नरेंद्र मान यांची NIA च्या दिल्लीतील विशेष न्यायालयात आणि अपीलीय न्यायालयांत खटल्यासाठी नियुक्ती करण्यात आली आहे. ही नियुक्ती अधिसूचना प्रसिद्ध झाल्यापासून पुढील ३ वर्षांसाठी किंवा खटला पूर्ण होईपर्यंत आहे.
अमेरिकेच्या परराष्ट्र सचिवांनी ११ फेब्रुवारी २०२४ रोजी राणाच्या प्रत्यार्पणासाठी आदेशावर स्वाक्षरी केली होती. त्यानंतर राणाच्या वकिलांनी त्या निर्णयाविरोधात आपत्कालीन स्थगन याचिका दाखल केली होती. मात्र, ७ एप्रिल रोजी अमेरिकेच्या सर्वोच्च न्यायालयाने त्या याचिकेला नकार दिला, ज्यामुळे राणाच्या भारतात हस्तांतरणास मार्ग मोकळा झाला. तहव्वूर राणा हा पाकिस्तानी-कॅनडाचा नागरिक असून, त्याला अमेरिकेत लष्कर-ए-तोयबा या दहशतवादी संघटनेला मदत केल्याबद्दल दोषी ठरवण्यात आले आहे. ही संघटना २००८ मध्ये मुंबईवर झालेल्या भीषण दहशतवादी हल्ल्यास जबाबदार होती, ज्यात १७४ पेक्षा अधिक निष्पाप नागरिकांचा मृत्यू झाला होता.
