नवी दिल्ली : दिल्लीच्या मालवीयनगरमधील एका हॉटेलला लागलेल्या आगीत २१ जणांचा मृत्यू झाला. यामध्ये १८ विदेशी नागरिकांचा समावेश आहे. हे विदेशी नागरिक वैद्यकीय उपचार आणि पर्यटनासाठी भारतात आले होते. आपला देश सोडून उपचार घेऊन जीव वाचविण्यासाठी आलेल्या यातील बहुतांशी नागरिकांवर जीव गमावण्याची वेळ आली.
आग लागलेले हॉटेल दिल्लीतील अग्रगण्य रुग्णालयांपैकी एक असलेल्या 'मॅक्स सुपरस्पेशालिटी हॉस्पिटल'च्या अगदी जवळ आहे. याबरोबर दिल्ली एम्सही हॉटेलपासून जवळच आहे. इतर मोठी रुग्णालये हॉटेलपासून जवळ आहेत. यामुळे विदेशी नागरिक जेव्हा दिल्लीत उपचारांसाठी येतात, तेव्हा ते मालवीयनगर परिसरातील हॉटेलमध्ये राहतात. सूत्रांनी दिलेल्या माहितीनुसार, आग लागलेल्या हॉटेलमध्ये वास्तव्यास असलेल्या विदेशी नागरिकांपैकी बहुतांश जण एकतर उपचार घेत होते किंवा मॅक्स हॉस्पिटलमध्ये दाखल असलेल्या रुग्णांचे नातेवाईक होते.
