नवी दिल्ली; वृत्तसंस्था : येथील मालवीयनगर येथे बुधवारी एका इमारतीला लागलेल्या भीषण आगीत किमान २१ लोकांचा मृत्यू झाला असून, अनेकजण गंभीर जखमी झाले आहेत. केवळ सहा खोल्यांचा 'बेड-अँड-ब्रेकफास्ट' चालवण्याचा परवाना असलेल्या या मालमत्तेचा बेकायदेशीरपणे २५ खोल्यांपर्यंत विस्तार करण्यात आल्याचा आरोप आहे.
'फ्लरिश स्टे' या नावाने चालवल्या जाणाऱ्या या इमारतीला सकाळी आग लागली. प्रत्यक्षदर्शींनी दिलेल्या माहितीनुसार, आगीची सुरुवात हॉटेलच्या रेस्टॉरंट भागातून झाली आणि ती वेगाने वरच्या मजल्यांवरील गेस्ट रुम्समध्ये पसरली. संपूर्ण इमारतीमध्ये धूर कोंडल्यामुळे अनेकजण आतच अडकून पडले. प्रत्यक्षदर्शींच्या व्हिडीओंमध्ये तेथील भीषण आणि चिंताजनक दृश्ये समोर आली आहेत, ज्यात काहीजण स्वतःचा जीव वाचवण्यासाठी जळत्या इमारतीवरून खाली उड्या मारताना दिसत आहेत. हा गोंधळ पाहून स्थानिक रहिवासी आणि नागरिकांनी खाली उड्या मारणाऱ्या लोकांचा बचाव करण्यासाठी जमिनीवर गाद्या अंथरल्या. मदत आणि बचाव कार्यादरम्यान सुमारे ४० लोकांना सुरक्षित बाहेर काढण्यात आले, तर काहींना तळघरातून (बेसमेंट) बाहेर काढण्यात आले.
सुरक्षा नियमांचे उल्लंघन?
दिल्ली सरकारच्या 'बेड-अँड-ब्रेकफास्ट' धोरणांतर्गत या मालमत्तेला केवळ ६ खोल्यांची परवानगी देण्यात आली होती; परंतु तिथे २५ खोल्या करण्यात आल्याचा आरोप आहे. या घटनेमुळे आता सुरक्षा नियमांचे पालन आणि प्रशासकीय देखरेखीच्या यंत्रणेवर गंभीर प्रश्न उपस्थित केले जात आहेत.
या घटनेनंतर साकेत येथील मॅक्स हॉस्पिटलच्या आपत्कालीन विभागात ३९ बाधितांना आणण्यात आले. रुग्णालय प्रशासनाने दिलेल्या माहितीनुसार, १८ लोकांना आणण्यापूर्वीच मृत घोषित करण्यात आले होते. सध्या १५ रुग्ण अतिदक्षता विभागात दाखल असून, त्यापैकी आठजण व्हेंटिलेटरवर आहेत आणि त्यांची प्रकृती चिंताजनक आहे. किरकोळ जखमी झालेल्या पाचजणांवर प्राथमिक उपचार करून त्यांना डिस्चार्ज देण्यात आला, तर गंभीर भाजलेल्या एका रुग्णाला पुढील विशेष उपचारांसाठी सफदरजंग रुग्णालयात हलवण्यात आले आहे.
तपास आणि पुढील कारवाई
आगीचे नेमके कारण अद्याप स्पष्ट झालेले नाही. इमारतीच्या मंजूर क्षमतेचे उल्लंघन केल्यामुळेच या दुर्घटनेची तीव्रता वाढली का, याचा तपास अधिकारी करणार आहेत.
