पुढारी ऑनलाईन डेस्क : मध्य प्रदेशमध्ये मुख्यमंत्री मोहन यादव यांनी राबविलेल्या लाडकी बहिण योजनेला मोठा प्रतिसाद मिळाला आहे. आता त्यांनी रक्षाबंधन सणाच्या तोंडावर लाडक्या बहिणीसाठी आणखी एक भेट देण्याचा निर्णय घेतला आहे. या योजनेतील पात्र महिलांना 450 रुपयांना एलपीजी सिलिंडर देण्यात येणार आहे. आज (दि.३०) झालेल्या मंत्रिमंडळाच्या बैठकीत हा निर्णय घेण्यात आला आहे.
शहरी विकास आणि गृहनिर्माण मंत्री कैलाश विजयवर्गीय यांनी सांगितले की, आमच्या सरकारने भगिनींना 450 रुपयांना गॅस सिलिंडर देण्याचा निर्णय घेतला आहे. त्यासाठी अर्थसंकल्पात तरतूद करण्यात आली आहे. सध्या गॅस सिलिंडर सुमारे ८४८ रुपयांना मिळतो. यामध्ये भगिनींना 450 रुपये द्यावे लागतील. उर्वरित ३९८ रुपयांची परतफेड राज्य सरकार करणार आहे. यासाठी सुमारे 160 कोटी रुपये खर्च येणार आहे. भगिनींबाबत आमची घोषणा होती की, गॅस सिलिंडर अनुदानावर दिले जातील.
मध्य प्रदेशचे भाजप सरकारही रक्षाबंधनानिमित्त लाडक्या बहिणींना खास भेटवस्तू देणार आहे. 1 ऑगस्ट रोजी लाडक्या बहिणींच्या खात्यात 250 रुपयांची स्वतंत्र रक्कम वाटप करण्यात येणार आहे. भाजप सरकार लाडक्या बहिणींना दरमहा 1250 रुपयांची आर्थिक मदत करते. म्हणजेच या महिन्यात लाडली बहीण योजनेशी संबंधित महिलांच्या खात्यात 1500 रुपये थेट जमा केले जाणार आहेत.
