lucknow coaching center fire : उत्तर प्रदेशची राजधानी लखनऊमधील अलीगंज भागात एक धक्कादायक घटना घडली आहे. येथील पुरनिया चौकाजवळील एका कोचिंग सेंटरला भीषण आग लागली. जीव वाचवण्यासाठी सात ते आठ विद्यार्थ्यांनी इमारतीवरून खाली उड्या मारल्या. मात्र, अजूनही सुमारे २० ते २५ विद्यार्थी आत अडकल्याची भीती स्थानिकांनी व्यक्त केल्याचे वृत्त 'पीटीआय'ने दिले आहे.
या आगीत अनेक जण अडकल्याची प्राथमिक माहिती आहे. दरम्यान, काही विद्यार्थ्यांनी इमारतीवरून उड्या मारून आपले प्राण वाचवले. सध्या युद्धपातळीवर मदत आणि बचावकार्य सुरू आहे. हायड्रॉलिक प्लॅटफॉर्मसह अग्निशामक दलाच्या १४ गाड्या आग विझवण्याचे काम करत आहेत. घटनेची माहिती मिळताच एडीसीपी (उत्तर) ट्विंकल जैन, डीएम विशाख आणि उपमुख्यमंत्री ब्रजेश पाठक यांनीही घटनास्थळी धाव घेतली आहे.
आग लागताच संपूर्ण इमारतीत वेगाने धूर पसरला. हे पाहून स्थानिक लोकांनी तातडीने अग्निशामक दलाशी संपर्क साधला. प्रत्यक्षदर्शींनी दिलेल्या माहितीनुसार, आगीने बघता बघता विक्राळ रूप धारण केले होते. दुर्घटना घडली तेव्हा कोचिंग सेंटरमध्ये मोठ्या संख्येने विद्यार्थी उपस्थित होते. आगीच्या ज्वाळा आणि धूर पसरताना पाहून विद्यार्थ्यांमध्ये एकच पळापळ झाली. सर्वत्र किंचाळ्या आणि गोंधळाचे वातावरण निर्माण झाले होते. अजूनही काही जण आत अडकल्याची भीती व्यक्त केली जात आहे.
घटनेची माहिती मिळताच अग्निशामक दलाच्या १४ गाड्या घटनास्थळी पोहोचल्या आणि आग आटोक्यात आणण्याच्या कामात जुटल्या. अग्निशामक दलाचे जवान शर्थीचे प्रयत्न करून आगीवर नियंत्रण मिळवण्याचा प्रयत्न करत आहेत. मदत आणि बचावकार्य सुरू आहे.
मुख्यमंत्री योगी आदित्यनाथ यांनी लखनऊच्या अलीगंजमधील या दुर्दैवी आग दुर्घटनेची गंभीर दखल घेतली आहे. त्यांनी संबंधित अधिकाऱ्यांना तात्काळ घटनास्थळी पोहोचण्याचे कडक निर्देश दिले. मुख्यमंत्र्यांनी मदत आणि बचावकार्याला गती देण्याच्या सूचना केल्या असून, जखमी विद्यार्थ्यांना तात्काळ आणि योग्य उपचार मिळवून देण्याचे स्पष्ट आदेश दिले आहेत. त्यांनी प्रशासनाला प्रत्येक स्तरावर पूर्ण सतर्कता बाळगण्याचे आणि मदतकार्यावर सतत देखरेख ठेवण्याचे निर्देश दिले आहेत. यासोबतच मुख्यमंत्र्यांनी सर्व जखमी विद्यार्थी लवकरात लवकर बरे व्हावेत अशी प्रार्थना केली असून, सरकार सर्वतोपरी मदतीसाठी तत्पर असल्याचे आश्वासन त्यांच्या कुटुंबीयांना दिले आहे.
