तिरूवनंतपुरम : पुढारी ऑनलाईन
केरळच्या एका अंगणवाडीतल्या मुलाचा व्हिडिओ व्हायरल होत आहे. ज्यामध्ये अंगणवाडी मेनूमध्ये बिरयाणी आणि चिकन फ्राय देण्याची मागणी तो करत आहे. राज्याच्या मंत्री विना जॉर्ज यांनी या मुलाच्या मागणीवर सकारात्मक विचार करत असल्याचे म्हटले आहे. अंगणवाडीच्या मेन्यूमध्ये बदल करण्याची शक्यताही त्यांनी वर्तवली आहे.
केरळच्या एका अंगणवाडी केंद्रामध्ये मुलाचा व्हिडीओ बनवण्यात आला आहे. या व्हिडीओमध्ये त्याने म्हटलंय की, अंगणवाडी केंद्रामध्ये उपमाच्या बदली बिर्याणी आणि चिकन फ्राय दिली पाहिजे. मुलाचा बिर्याणी आणि चिकन फ्राय मागणारा व्हिडीओ सोशल मीडियावर व्हायरल होत आहे. हा व्हिडिओ राज्याच्या मंत्र्यांपर्यंत पोहोचला. त्यांनी मुलाच्या मागणीवरून अंगणवाडीच्या मेन्यूमध्ये बदल करण्यास सांगितले आहे.
या मुलाचा व्हिडीओ सोशल मीडियावर व्हायरल झाल्यानंतर केरळच्या बालसंगोपन केंद्रांमधील मेन्यू बदलण्याची शक्यता आहे. राज्याच्या आरोग्य, महिला आणि बाल कल्याण मंत्री वीणा जॉर्ज यांनीही त्यांच्या फेसबुक पेजवर शंकू नावाच्या मुलाचा व्हिडिओ शेअर केला.
व्हिडिओमध्ये हा मुलगा बिर्याणी आणि चिकन फ्रायची मागणी करत आहे. हा व्हिडिओ शेअर करत विना जॉर्ज यांनी लिहिलंय की, 'अंगणवाडीच्या मेनूमध्ये बदल होईल.' त्यांनी सांगितले की मुलाने ही विनंती निरागसतेतून केली आहे आणि त्यावर विचार केला जात आहे.
शंकू, त्याची आई आणि अंगणवाडी सेविकांचे हार्दिक अभिनंदन करताना मंत्री म्हणाले, "शंकूच्या सूचनेनुसार मेनूचा आढावा घेतला जाईल." जॉर्ज म्हणाले की, मुलांना पौष्टिक आहार मिळावा यासाठी अंगणवाड्यांमार्फत विविध प्रकारचे अन्न पुरवले जाते.
या व्हिडिओमध्ये टोपी परिधान केलेला निरागस छोटा मुलगा आईला म्हणतो की, 'आई मला अंगणवाडीत उपमा ऐवजी बिरनानी (बिर्याणी) आणि पोरिचा कोझी' (चिकन फ्राय) पाहिजे.
त्या मुलाच्या आईने सांगितले की, घरात बिर्याणी खाताना हा व्हिडीओ बनवण्यात आला आहे. त्याचा व्हिडीओ बनवण्यात आल्यानंतर तो व्हिडीओ सोशल मीडियाच्या 'इंस्टाग्राम' वर पोस्ट करण्यात आला. ज्यानंतर तो मोठ्या प्रमाणात व्हायरल झाला.
