पुढारी ऑनलाईन डेस्क : २०२३ म्हणजे मागील वर्षी त्यांची भारतीय पोलीस सेवेत (आयपीएस) अधिकारी म्हणून निवड झाली. प्रशिक्षणही पूर्ण झालं. कर्नाटक केडरचे अधिकारी म्हणून त्यांची हसन येथे पोस्टिंगही झाली. मात्र नियतीला हे मान्य नव्हतं. पोस्टिंगसाठी जाताना कर्नाटकच्या हसन जिल्ह्यात रस्ते अपघातात त्यांचा मृत्यू झाला. हर्ष वर्धन असे दुर्दैवी अधिकार्याचे नाव आहे. या दुर्घटनेवर कर्नाटकचे मुख्यमंत्री सिद्धरामय्या यांनी तीव्र दु:ख व्यक्त केले आहे.
२६ वर्षीय हर्ष वर्धन हे कर्नाटक केडरचे अधिकारी होते. नुकतेच त्यांनी म्हैसूर येथील कर्नाटक पोलीस अकादमीमध्ये प्रशिक्षण पूर्ण केले होते. सहायक पोलिस अधीक्षक म्हणुन पहिले पोस्टिंग हे कर्नाटकमधील हसन जिल्ह्यात झाले होते. आपल्या कर्तव्यावर रुजू होण्यासाठी ते कारमधून जात होते. हसनपासून सुमारे १० किलोमीटर अंतरावर असणार्या किटणेजवळ रविवारी (दि.1) दुपारी ४.२० सुमारास त्यांच्या कारचे टायर फुटला. कार एका घरावर आणि रस्त्यालगतच्या झाडावर आदळली. वर्धन यांच्या डोक्याला गंभीर दुखापत झाली. त्यांना हसन येथील जनप्रिया रुग्णालयात दाखल करण्यात आले. बंगळूरु येथील रुग्णालयात त्यांना दाखल करण्यात आले मात्र उपचारादरम्यान त्यांचा मृत्यू झाला.
हर्ष वर्धन यांचे कुटुंबीय मूळचे बिहारचे. त्यांचे वडील अखिलेश हे मध्य प्रदेशातील सिंगरौली जिल्ह्यातील दोसर गावातील रहिवासी आहेत. ते उपविभागीय दंडाधिकारी म्हणून कार्यरत आहेत. हर्ष वर्धन यांच्या अपघाती मृत्यूवर कर्नाटकचे मुख्यमंत्री सिद्धरामय्या यांनी तीव्र दु:ख व्यक्त केले आहे. X वरील एका पोस्टमध्ये त्यांनी म्हटलं आहे की, , "जेव्हा अनेक वर्षांच्या मेहनतीचे फळ मिळत होते तेव्हा असे घडलाय नको होते." माजी मुख्यमंत्री सदानंद गौडा यांनीही या दुर्घटनेवर शोक व्यक्त केला आहे. एका समर्पित तरुण अधिकाऱ्याला देश मुकला असल्याचे त्यांनी म्हटलं आहे.
