kalpita majhi maid to bjp mla bengal assembly election victory
कोलकाता : पुढारी ऑनलाईन
भाजपच्या कल्पिता माझींनी घरकामगार ते आमदार असा अनोखा प्रवास पूर्ण केला आहे. बंगालमधील मझपुकुर पार येथील रहिवासी असलेल्या कल्पिता यांनी चार घरांमध्ये साफसफाईचे काम करत कुटुंबाचा उदरनिर्वाह केला.
पश्चिम बंगालमधील औशग्राम विधानसभा मतदारसंघाने यावेळी अशी गोष्ट घडवली आहे, ज्यात राजकारणापेक्षा सामान्य आयुष्यातील संघर्ष अधिक ठळकपणे समोर आला आहे. भारतीय जनता पक्षाच्या (बीजेपी) उमेदवार कल्पिता माझींनी या मतदारसंघातून विजय मिळवत आमदारपद पटकावले आहे.
गुस्करा नगरपालिका क्षेत्रातील वार्ड क्रमांक ३ मधील मझपुकुर पार येथे राहणाऱ्या कल्पिता माझी यांना पूर्वी फक्त घरकाम करणारी महिला म्हणून ओळखले जात होते. त्या चार घरांमध्ये झाडू-पोछा आणि साफसफाई करून सुमारे ₹2,500 महिना कमावत कुटुंबाचा खर्च भागवत होत्या. पण आता त्याच कल्पिता माझी जनतेच्या मतांनी आमदार बनल्या आहेत.
निवडणूक निकालानुसार, कल्पिता माझींनी औशग्राम मतदारसंघातून 1,07,692 मते मिळवून प्रतिस्पर्धी श्यामा प्रसन्ना लोहार यांचा 12,535 मतांनी पराभव केला. हा विजय केवळ राजकीय यश नसून त्यांच्या दीर्घ संघर्षाची मोठी ओळख आहे. कल्पिता माझी ड्राय क्लिनिंग आणि साफसफाईचे काम करून कुटुंब चालवत होत्या. अनुसूचित जाती (SC) वर्गातून येणाऱ्या कल्पिता यांनी उमेदवारी जाहीर झाल्यानंतर लगेच प्रचाराला सुरुवात केली होती.
सन 2021 च्या पश्चिम बंगाल विधानसभा निवडणुकीतही त्या बीजेपीच्या तिकिटावर निवडणूक लढल्या होत्या. मात्र त्यावेळी त्यांना तृणमूल काँग्रेसच्या उमेदवाराकडून पराभव पत्करावा लागला होता. तरीही पक्षाने त्यांच्यावर विश्वास ठेवला आणि यावेळी तो विश्वास विजयात परिवर्तित झाला.
घरकामापासून ते निवडणुकीच्या मैदानापर्यंतचा त्यांचा प्रवास अत्यंत साध्या आयुष्यातून उभा राहून जनतेमध्ये स्थान निर्माण करण्याची प्रेरणादायी कथा आहे. प्रचारादरम्यानही त्या घराघरांत जाऊन लोकांशी संपर्क साधत राहिल्या आणि आपल्या संघर्षालाच ताकद बनवून मांडले.
दरम्यान, या निवडणुकीत भारतीय जनता पक्षाने बंगालमध्ये पहिल्यांदाच मोठा विजय मिळवला आहे. निकालांनुसार, भाजपने 206 जागांवर विजय मिळवत राज्यातील सर्वात मोठा पक्ष म्हणून उदयास आला आहे.
दुसरीकडे, तृणमूल काँग्रेसला या निवडणुकीत मोठा धक्का बसला असून पक्षाला 80 जागांवर विजय मिळाला आहे, तर एका जागेवर आघाडी आहे (एकूण 81 जागा). काँग्रेसला फक्त 2 जागा मिळाल्या, तर AJUPलाही 2 जागांवरच समाधान मानावे लागले. डाव्या पक्षांपैकी CPI(M) ला 1 जागा आणि AIFलाही 1 जागा मिळाली आहे.
