नवी दिल्ली : राष्ट्रवादी काँग्रेस पक्ष आणि चिन्ह प्रकरणी सुनावणी आता १७ डिसेंबरला होण्याची शक्यता आहे. सर्वोच्च न्यायालयाच्या वेळापत्रकात ही संभाव्य तारीख नमूद करण्यात आली आहे. राज्यात सरकार बदलल्यानंतर होणारी ही पहिलीच सुनावणी असेल.
राज्यात झालेल्या विधानसभा निवडणुकीपूर्वी अजित पवार गट शरद पवारांचा फोटो वापरत आहे, असे म्हणत एक अंतरिम अर्ज शरद पवार गटाने सर्वोच्च न्यायालयात दाखल केला होता. याच अर्जात अजित पवारांनाही वेगळे चिन्ह देण्यात यावे, अशी मागणी शरद पवार गटाने केली होती. त्यावर सर्वोच्च न्यायालयाने अजित पवार गटाला दिलेल्या निर्देशांचे त्यांनी काटेकोर पालन करावे, असे आदेश दिले होते. त्यानंतर ही सुनावणी होत आहे.
राष्ट्रवादी काँग्रेस पक्ष आणि चिन्हाबाबत निवडणूक आयोगाने दिलेल्या निर्णयाविरुद्ध शरद पवार गटाकडून सर्वोच्च न्यायालयात याचिका दाखल करण्यात आली होती. राष्ट्रवादी काँग्रेसमध्ये फूट पडल्यानंतर निवडणूक आयोगाच्या वतीने राष्ट्रवादी काँग्रेस पक्षाचे नाव आणि घड्याळ हे पक्षाचे चिन्ह अजित पवार यांना देण्यात आले होते. निवडणूक आयोगाच्या या निर्णयाविरुद्ध शरद पवार गटाकडून सर्वोच्च न्यायालयात याचिका दाखल करण्यात आली होती.
