Crime News
गाझियाबाद: आर्थिक विवंचना आणि मानसिक आजाराच्या भरात एका ४८ वर्षीय व्यक्तीने आपल्याच पत्नीची आणि १५ वर्षांच्या मुलीची गळा चिरून अत्यंत निर्घृणपणे हत्या केली. गाझियाबादमधील खोडा परिसरातील लोकप्रिय विहार येथे शुक्रवारी मध्यरात्री ही घटना घडली. या हल्ल्यात १४ वर्षांची दुसरी मुलगी किरकोळ जखमी झाली असून ती सुदैवाने बचावली आहे. पोलिसांनी संशयित आरोपी पतीला घटनास्थळावरूनच ताब्यात घेतले आहे.
मोहम्मद राजा अंसारी (वय ४८) असे अटक करण्यात आलेल्या आरोपीचे नाव असून, बेबी तबस्सुम (वय ४३) असे मृत पत्नीचे आणि तरनुम (वय १५) असे मृत मुलीचे नाव आहे. पोलिसांनी दिलेल्या माहितीनुसार, संशयित आरोपीने शुक्रवारी रात्री पत्नीवर चाकूने वार करण्यास सुरुवात केली. आईचा वाचवा-वाचवा असा आवाज ऐकून १५ वर्षांची मुलगी धावत आली; मात्र नराधम बापाने तिच्यावरही चाकूने वार केले. या दुर्घटनेत दोघींचाही जागीच मृत्यू झाला.
पोलीस तपासात समोर आलेल्या माहितीनुसार, आरोपी अंसारी २०२२ पासून मानसिक आजाराने ग्रस्त होता आणि गेल्या दीड महिन्यापासून त्याने वैद्यकीय उपचार व औषधे घेणे बंद केले होते. औषधे पुन्हा सुरू करण्यावरून पत्नीसोबत त्याचा वाद झाला होता. यातूनच त्याने गाझीपूर बाजारातून चाकू खरेदी करून कुटुंबाचा खात्मा करण्याचा कट रचल्याचे स्पष्ट झाले आहे.
"घरखर्च चालवणे कठीण झाले होते आणि आजारपणामुळे मी प्रचंड तणावात होतो. या सर्व जबाबदाऱ्यांमधून कुटुंबाची अन् माझी मुक्तता व्हावी म्हणूनच मी हे कृत्य केले. तेव्हा मला हे योग्य वाटले, पण आता मला पश्चात्ताप होत आहे," अशी कबुली आरोपीने पोलिसांसमोर दिली. या प्रकरणात वाचलेल्या १४ वर्षांच्या मुलीच्या तक्रारीवरून खोडा पोलीस ठाण्यात आरोपीविरुद्ध गुन्हा दाखल करण्यात आला असून पोलीस पुढील तपास करत आहेत.
