Varanasi Viral Video Row
वाराणसी: सोशल मीडियावर व्हायरल होणार्या एका व्हिडिओमुळे शहरात मोठी खळबळ उडाली आहे. या व्हिडिओमध्ये १५-२० मुस्लिम तरुण गंगा नदीत एका नौकेत बसून 'इफ्तार' करताना दिसत आहेत. या व्हिडिओवर हिंदू संघटनांनी तीव्र आक्षेप घेत वाराणसीतील कोतवाली पोलीस ठाण्यात फिर्याद दिली आहे. पोलिसांनी याप्रकरणी भारतीय न्याय संहितेच्या (BNS) गंभीर कलमान्वये गुन्हा दाखल करून मदनपुरा भागातील १४ तरुणांना अटक केली आहे.
मंगळवारी समोर आलेल्या या व्हिडिओची शहरात जोरदार चर्चा सुरू आहे. व्हिडिओमध्ये अंदाजे १५ ते २० रोजेदार गंगेच्या पात्रात एका नौकेवर बसून इफ्तार करत असल्याचे दिसत आहे. व्हिडिओ बनवणारा तरुण नौकेवर ठेवलेल्या खाद्यपदार्थांकडे कॅमेरा फिरवतो, ज्यात एका बाजूला बिर्याणी देखील ठेवलेली दिसत आहे. हा व्हिडिओ समोर येताच हिंदू संघटनांनी संताप व्यक्त केला असून, "गंगा केवळ नदी नसून ती आमची माता आहे," अशी भूमिका मांडली आहे.
या घटनेची माहिती देताना वाराणसी एसीपी कोतवालीचे एसीपी विजय प्रताप यांनी सांगितले की, भाजप युवा मोर्चाशी संबंधित रजत जयस्वाल यांनी या व्हिडिओबाबत तक्रार दिली होती. तक्रारीनुसार, व्हिडिओमध्ये दिसणारे तरुण नौकेत बसून चिकन बिर्याणी खात आहेत आणि त्यानंतर त्याचे अवशेष गंगा नदीत फेकत आहेत. तपासात असे निष्पन्न झाले की, हा व्हिडिओ १५ मार्च रोजी सोशल मीडियावर अपलोड करण्यात आला होता.
एसीपी विजय प्रताप यांनी दिलेल्या माहितीनुसार, अटक करण्यात आलेल्यांमध्ये व्हिडिओ अपलोड करणाऱ्या तहसीमचाही समावेश आहे. हे सर्व तरुण वाराणसीच्या मदनपुरा भागातील रहिवासी आहेत. पोलीस व्हिडिओमध्ये दिसणाऱ्या इतर व्यक्तींची ओळख पटवण्याचे काम करत आहेत. या सर्वांवर बीएनएस (BNS) च्या कलम २९८, २९९, २९६(1B), २७० आणि २७९ अंतर्गत गुन्हे दाखल करण्यात आले आहेत.
