नवी दिल्ली : मराठीतील ज्येष्ठ समीक्षक आणि लेखक डॉ. सुधीर रसाळ यांना त्यांच्या समीक्षात्मक ग्रंथ ‘विंदांचे गद्यरूप’ यासाठी तर गुजराती भाषेसाठी दिलीप झवेरी यांना त्यांच्या 'भगवाननी वातो' या कवितासंग्रहासाठी प्रतिष्ठित साहित्य अकादमी पुरस्काराने शनिवारी सन्मानित करण्यात आले.
राजधानी दिल्लीत एका शानदार कार्यक्रमात पुरस्कार प्रदान सोहळा पार पडला. या कार्यक्रमाला प्रख्यात नाटककार आणि लेखक महेश दत्तानी प्रमुख अतिथी म्हणून उपस्थित होते तर साहित्य अकादमीचे अध्यक्ष माधव कौशिक, उपाध्यक्ष कुसुम शर्मा तसेच सचिव के. श्रीनिवासराव आणि विविध भाषांमधील साहित्य अकादमी पुरस्कार प्राप्त मान्यवर उपस्थित होते.
साहित्य अकादमी पुरस्काराचे स्वरूप ताम्रपत्र, शाल आणि एक लाख रु. असे आहे. शनिवारी २३ प्रादेशिक भाषांमधील नामांकित साहित्यिकांच्या साहित्यकृतींना गौरवण्यात आले.
मराठी साहित्य क्षेत्रातील ज्येष्ठ समीक्षक डॉ.सुधीर रसाळ यांच्या “विंदांचे गद्यरुप” या समीक्षात्मक पुस्तकात प्रख्यात मराठी कवी आणि समीक्षक विंदा करंदीकर यांच्या समीक्षात्मक लेखनावर सविस्तर चर्चा करण्यात आलेली आहे. डॉ.सुधीर रसाळ हे मराठीतील मान्यवर समीक्षक आणि लेखक आहेत. त्यांनी दीर्घकाळ मराठी वाङ्मयाची समीक्षा करत उल्लेखनीय योगदान दिले आहे.
गुजराती भाषेतील ज्येष्ठ कवी, लेखक आणि समीक्षक दिलीप झवेरी यांचा 'भगवाननी वातो' हा गुजराती भाषेतील हा कवितासंग्रह नाजूकपणे रोजच्या बोली भाषेत मांडलेला आहे. या कविता संग्रहामध्ये संपूर्ण ब्रह्मांडाला एकत्रित करण्याचा प्रयत्न आहे. यामध्ये राजकीय व्यवस्था, विज्ञान, इतिहास, भूतकाळ आणि वर्तमान यांचे एकत्रित मिलाफ करून कविता गुंफल्या आहेत.
कोकणी भाषेसाठी लेखक नाटककार समालोचक आणि अनुवादक मुकेश थळी यांना त्यांच्या 'रंगतरंग ' निबंध संग्रहासाठी साहित्य अकादमी पुरस्काराने सन्मानित करण्यात आले. रंगतरंग या निबंध संग्रहात एकूण २४ वेगवेगळ्या विषयांवर निबंध लिहिलेले आहेत. या निबंधाची भाषा अत्यंत सुंदर तथा सहज स्पष्ट आणि आकर्षक आहे.
