Bangladeshis becoming Indians for ₹700; shocking reality revealed by an infiltrator caught in Kerala
पुढारी ऑनलाईन : Bangladeshi in India Kerala: केरळमध्ये सुमारे १०,००० बांगलादेशी नागरिक बनावट ओळखपत्रांच्या आधारे ‘स्थलांतरित मजूर’ म्हणून राहत असल्याचा धक्कादायक खुलासा झाला आहे. केवळ ७०० रुपयांत बनावट आधार, पॅन आणि मतदार ओळखपत्र तयार करून देणाऱ्या बेंगळुरूस्थित रॅकेटचा पर्दाफाश झाल्यानंतर सुरक्षा यंत्रणा सतर्क झाल्या आहेत.
केरळमधून राष्ट्रीय सुरक्षेच्या दृष्टीने अत्यंत चिंताजनक माहिती समोर आली आहे. एका अलीकडील मीडिया अहवालानुसार, राज्याच्या विविध भागांत जवळपास १०,००० बांगलादेशी नागरिक बनावट कागदपत्रांच्या आधारे भारतीय नागरिक असल्याचा आव आणून राहत आहेत. या मोठ्या अवैध जाळ्याचा उलगडा तेव्हा झाला, जेव्हा पोलिसांनी कोल्लम जिल्ह्यातील कोट्टारक्करा येथे १० बांगलादेशी नागरिकांना ताब्यात घेतले.
या व्यक्ती अनेक वर्षांपासून केरळमध्ये भारतीय नागरिकांप्रमाणे राहत होत्या. सर्वात धक्कादायक बाब म्हणजे, त्यांनी अगदी कमी पैशांत बनावट भारतीय ओळखपत्रेही मिळवली होती.
घुसखोरी आणि बनावट ओळखीची पद्धत
तपास अधिकाऱ्यांच्या माहितीनुसार, ही घुसखोरी प्रामुख्याने बांगलादेश सीमेलगतच्या भागांतून सुरू होते. हे लोक प्रथम पश्चिम बंगालमधील मुर्शिदाबादसारख्या भागांत पोहोचतात आणि तेथे सुरुवातीची बनावट कागदपत्रे तयार करून घेतात.
त्यानंतर रोजगाराच्या शोधात ते देशातील इतर भागांमध्ये, विशेषतः केरळमध्ये जातात. पश्चिम बंगालमधील स्थलांतरित मजूर असल्याचे भासवून ते केरळमध्ये पोहोचतात आणि स्थानिक पत्त्यांचा वापर करून पूर्णपणे भारतीय ओळख प्राप्त करतात.
अवघ्या ७०० रुपयांत मिळत होते महत्त्वाचे दस्तऐवज
इंग्रजी वृत्तसंस्था ‘मातृभूमी’च्या अहवालानुसार, केरळमध्ये या बांगलादेशी नागरिकांना केवळ ७०० रुपये देऊन आधार कार्ड, रेशन कार्ड यांसारखी अत्यंत महत्त्वाची सरकारी कागदपत्रे मिळत होती. या बनावट कागदपत्रांच्या आधारे ते स्वतःला भारतीय नागरिक म्हणून सादर करत होते.
बेंगळुरूतील रॅकेट आणि ‘चेन मायग्रेशन’
पोलिसांना संशय आहे की या बनावट कागदपत्रांच्या मागे बेंगळुरूमधून कार्यरत असलेले मोठे रॅकेट असू शकते. ही कागदपत्रे इतकी अचूक बनवली जातात की खरी आणि बनावट यामध्ये फरक करणे कठीण होते.
कोट्टारक्करा येथे पकडलेल्या व्यक्ती अनेक वर्षांपासून केरळमध्ये राहत होत्या. त्यांच्या मोबाईल फोनची तपासणी करताना बांगलादेशी पासपोर्टच्या प्रती आढळल्या आणि त्यानंतर त्यांची खरी ओळख उघडकीस आली.
तपासात ‘चेन मायग्रेशन’चाही प्रकार समोर आला आहे. यामध्ये आधी आलेले लोक आपल्या नातेवाईकांनाही येथे बोलावतात. याचे उदाहरण म्हणजे मुगल खातून नावाची महिला. ती १३ वर्षांपूर्वी पश्चिम बंगालमार्गे केरळमध्ये आली होती. तिने “ममदास” या नावाने भारतीय ओळखपत्रे मिळवली आणि नंतर आपल्या अनेक नातेवाईकांनाही केरळमध्ये आणले.
अहवालानुसार, अटकेच्या दोन महिन्यांपूर्वी तिने बांगलादेशी पासपोर्टचा वापर करून आपल्या दोन मुलांसह बांगलादेशलाही भेट दिली होती.
राष्ट्रीय सुरक्षेसाठी गंभीर धोका
केंद्रीय आणि राज्य गुप्तचर यंत्रणा या संपूर्ण प्रकरणाकडे राष्ट्रीय सुरक्षेसाठी गंभीर धोका म्हणून पाहत आहेत. प्रशासन आता याची सखोल चौकशी करत आहे की, या बनावट कागदपत्रांचा वापर गुन्हेगारी पार्श्वभूमी असलेल्या किंवा राष्ट्रविरोधी कारवायांशी संबंधित व्यक्तींनी केला आहे का.
भाषा आणि उच्चारांमधील फरकामुळे पश्चिम बंगालमधील खरे मजूर आणि बांगलादेशी नागरिक यांच्यातील फरक ओळखता येऊ शकतो. मात्र भीतीपोटी अनेक स्थानिक नागरिक पोलिसांना माहिती देण्यास टाळाटाळ करतात.
तपास अधिक तीव्र झाल्याने आणि प्रशासनाची कडक कारवाई सुरू झाल्याने अनेक बांगलादेशी नागरिक आता केरळ सोडण्याच्या तयारीत असल्याचे सांगितले जात आहे. काही भागांत स्थलांतरित मजुरांची संख्या लक्षणीयरीत्या घटल्याचेही दिसून आले आहे.
