‘वाईट हेतूने मुलीचा हात धरणे विनयभंगच’; न्यायालयाचा निर्वाळा

मुंबई : वाईट हेतूने मुलीचा हात पकडणे हा विनयभंगाचाच गुन्हा आहे, असा महत्त्वपूर्ण निर्वाळा दिंडोशी सत्र न्यायालयाने दिला. न्यायाधीश डी. जी. ढोबळे यांनी आरोपीचा दोषमुक्ततेचा अर्ज फेटाळून लावताना आरोपीने वाईट हेतूने मुलीचा हात पकडल्याचे पुरेसे पुरावे आहेत. त्याआधारे त्याच्याविरुद्ध खटला चालवला पाहिजे, असे निरीक्षण नोंदवले.

कांदिवली पश्चिम येथील आरोपी प्रल्हाद कांबळेने कॉलेजला चाललेल्या अल्पवयीन मुलीला रस्त्यात थांबवून तिचा हात पकडला. तसेच तिला गिफ्ट देण्याचा प्रयत्न केला. मुलीने मात्र गिफ्ट घेण्यास नकार दिला होता. आरोपीच्या कृत्याची माहिती मिळाल्यानंतर पीडित मुलीच्या आईने पोलिस तक्रार केली. त्याआधारे प्रल्हाद कांबळेविरोधात विलेपार्ले पोलिस ठाण्यात पोक्सो कायदा तसेच भा.दं.वि. कलमांन्वये विनयभंगाचा गुन्हा दाखल केला.