Abhijit Dipke broke down in tears in front of an American channel, saying, "When I was in India..."
पुढारी ऑनलाईन : अभिजीत दीपके हे एका अमेरिकन चॅनेलच्या एका व्हिडिओमध्ये रडताना दिसले. अमेरिकेतून भारतात परतताना मनात असलेल्या चिंतांबद्दल सांगत असताना ते भावुक झाले. या मुलाखतीत त्यांनी आपल्या भावनांना वाट मोकळी करून दिली..
‘कॉकरोच जनता पार्टी’ (CJP)चे प्रमुख अभिजीत दीपके हे अमेरिकन मीडिया समूह ‘न्यूयॉर्क टाइम्स’च्या एका व्हिडिओमध्ये ढसाढसा रडू लागले. जंतर-मंतरवर महिन्याहून अधिक काळ आंदोलन करून केंद्र सरकारला शिक्षणमंत्र्यांचा राजीनामा घेण्यास भाग पाडणाऱ्या दीपके यांनी अमेरिकेतून भारतात येतानाच्या काळातील आपल्या चिंता व्यक्त केल्या. यावेळी कुटुंबाबद्दल बोलताना ते भावुक झाले आणि त्यांच्या डोळ्यांत अश्रू आले.
अभिजीत दीपके यांच्यावर ‘न्यूयॉर्क टाइम्स’ने ‘ओपिनियन’ या विभागात एक डॉक्युमेंटरी प्रसिद्ध केली आहे. या डॉक्युमेंटरीमध्ये दीपके स्वतः CJP आंदोलनाबद्दल सविस्तर माहिती देताना दिसत आहेत. अमेरिकन वृत्तपत्राच्या यूट्यूब चॅनेलवर अपलोड करण्यात आलेल्या या व्हिडिओमध्ये त्यांनी सांगितले की, बोस्टनमध्ये शिक्षण घेत असताना त्यांनी सोशल मीडियावर भारताचे सरन्यायाधीश सूर्यकांत यांच्या एका वक्तव्याबद्दल वाचले. त्यानंतर त्यांनी गंमत म्हणून ‘कॉकरोच जनता पार्टी’ नावाचे एक हँडल तयार केले.
हे हँडल लोकप्रिय होण्यापासून ते भारतात परत येऊन आंदोलन करण्यापर्यंत आणि त्यानंतर सरकारकडून उचलण्यात आलेल्या पावलांपर्यंतचा संपूर्ण घटनाक्रम दीपके यांनी या व्हिडिओमध्ये सांगितला आहे.
दीपके यांनी यावेळी भारतात येण्यापूर्वी स्वतःला अटक होण्याची भीती वाटत असल्याचेही सांगितले. त्यांना आपल्या कुटुंबाचीही मोठी चिंता होती. दीपके म्हणाले, “जेव्हा विमान भारताच्या जवळ पोहोचले, तेव्हा मी तिथून हिमालयाची पर्वतरांग पाहत होतो. मला वाटले की, मी मोकळे आकाश पाहण्याची ही कदाचित शेवटची वेळ आहे. माझी सर्वात मोठी चिंता माझ्या कुटुंबाबद्दल होती.”
हे सांगताच अभिजीत दीपके ढसाढसा रडू लागले. डोळ्यांतील अश्रू पुसत त्यांनी स्वतःला सावरण्याचा प्रयत्न केला. दीपके यांचा हा व्हिडिओ आता सोशल मीडियावरही मोठ्या प्रमाणात व्हायरल होत आहे.
भारतात येण्याचे सांगितल्यावर आई रडू लागल्या : दीपके
अभिजीत दीपके यांनी सांगितले की, या आंदोलनातून त्यांना दोन महत्त्वाचे धडे मिळाले. त्यांनी सांगितले की, जेव्हा त्यांनी भारतात परतण्याचा निर्णय घेतला, तेव्हा त्यांच्या आई रडू लागल्या.
दीपके म्हणाले, “या आंदोलनातून मी पहिला धडा शिकलो तो म्हणजे तुम्हाला नक्कीच नशिबाची आणि योग्य वेळेची गरज असते. मी अमेरिकेत बसलो होतो, पण त्यावर मी लगेच प्रतिक्रिया दिली. आज आमचे २.६ कोटी फॉलोअर्स आहेत. हे सर्व केवळ दोन महिन्यांत घडले आहे.”
ते पुढे म्हणाले, “दुसरा धडा असा की, तुम्हाला धाडसी असावे लागते आणि जे धोके दुसरे कोणी पत्करण्यास तयार नाहीत, ते तुम्हाला पत्करावे लागतात. मी भारतात परतण्याचा निर्णय घेतला, जेणेकरून मी हे दाखवून देऊ शकेन की, मी राष्ट्रीय सुरक्षेसाठी धोका नाही.”
“जेव्हा मी भारतात परतण्याचा निर्णय घेतल्याचे माझ्या आईला सांगितले, तेव्हा त्या फूटफूटून रडू लागल्या. मी त्यांना सांगितले की, हा निर्णय धोकादायक आहे, पण हा धोका पत्करणे आवश्यक आहे,” असे दीपके यांनी सांगितले.
