अहमदाबाद; वृत्तसंस्था : गुजरात सरकारने विधानसभेत कबूल केले आहे की, गेल्या दोन वर्षांत 37.35 कोटी रुपये खर्च करूनही 307 आशियाई सिंहांचा मृत्यू झाला आहे. यामुळे राज्याच्या सिंह संवर्धन धोरणांवर गंभीर प्रश्न निर्माण झाले आहेत. सध्या सिंहांची एकूण संख्या 891 असून, ती सात जिल्ह्यांमध्ये पसरलेली आहे.
सरकारने दिलेल्या आकडेवारीनुसार, ऑगस्ट 2023 ते जुलै 2024 या काळात 141 सिंहांचा मृत्यू झाला, तर ऑगस्ट 2024 ते जुलै 2025 या काळात ही संख्या 166 वर पोहोचली. मृत्यूचे मुख्य कारण रोगराई असून, पहिल्या वर्षी 60, तर दुसर्या वर्षी 81 सिंहांचा बळी गेला. याशिवाय, प्रादेशिक संघर्षात 38 सिंहांचा मृत्यू झाला, तर मानवी धोकेही वाढले. यामध्ये उघड्या विहिरी, रेल्वे अपघात आणि विजेचा धक्का यांसारख्या घटनांमुळे अनेक सिंहांनी जीव गमावला.
सिंहांच्या मृत्यूचा सर्वाधिक फटका अमरेली जिल्ह्याला बसला आहे, जिथे सिंहसंख्या सर्वाधिक आहे. जानेवारी ते जुलै 2025 या सात महिन्यांत अमरेलीमध्ये 31 सिंहांचा मृत्यू झाला, ज्यात 14 बछड्यांचा समावेश आहे. निमोनिया, निमिया आणि सेप्टिसेमियासारख्या उपचारात्मक रोगांमुळे अनेक जीव गेले, ज्यामुळे पशुवैद्यकीय सेवा आणि आरोग्य व्यवस्थापनातील कमतरता स्पष्ट झाली आहे.
खर्चाचा हिशेब : सरकारने दोन वर्षांत 37.35 कोटी रुपये खर्च करूनही मृत्यू संख्या वाढली.
सर्वाधिक मृत्यू : रोगराई हे सिंहांच्या मृत्यूचे सर्वात मोठे कारण ठरले आहे.
अमरेलीची स्थिती : सर्वाधिक सिंह संख्या असलेल्या अमरेली जिल्ह्यात सर्वाधिक मृत्यूची नोंद झाली.
जागतिक महत्त्व : आशियाई सिंहांसाठी गुजरात हे जगातील एकमेव नैसर्गिक अधिवास आहे.
