गुलबर्गा (कर्नाटक) : एक प्लेट पावभाजीने संपूर्ण चोरीच्या प्रकरणाचा उलगडा केला, हे ऐकून कोणीही आश्चर्यचकित होईल! कर्नाटकातील गुलबर्गा येथे एका दागिन्यांच्या दुकानात भरदिवसा झालेल्या मोठ्या चोरीचा तपास चविष्ट पावभाजीच्या माध्यमातून लागला आणि पोलिसांनी तब्बल 2.15 कोटी रुपये किमतीचे सोने हस्तगत केले.
11 जुलै रोजी अयोध्या प्रसाद चौहान (वय 48), फारूख अहमद मलिक (40) आणि सोहेल शेख ऊर्फ बादशाह यांनी एकत्र येऊन मारथुल्ला मलिक यांच्या दागिन्यांच्या दुकानावर डल्ला मारण्याची योजना आखली. त्यांच्यासोबत एका स्थानिक गुन्हेगाराचाही सहभाग होता, ज्याचा शोध पोलिस अजून घेत आहेत. फारूख या चोरीचा सूत्रधार होता. त्याचा स्वतःचा सुवर्ण व्यवसाय तोट्यात गेला होता आणि त्याच्यावर 40 लाख रुपयांचे कर्ज होते. त्यातूनच त्याने हा धाडसी निर्णय घेतल्याचे उघड झाले.
चोरीच्या दिवशी, फारूखने दुकानाबाहेर उभे राहून लक्ष ठेवण्याचे काम केले, तर इतर तीनजणांनी बंदुका घेऊन दुकानात प्रवेश केला. दुकानदाराचे हात-पाय दोरीने बांधून त्यांनी लॉकर उघडला आणि दागिने व रोख रक्कम घेऊन पळाले. सुरुवातीला दुकानदाराने फक्त 805 ग्रॅम सोने चोरी झाल्याचे सांगितले; परंतु पोलिसी चौकशीत पुढे उघड झाले की, प्रत्यक्षात 3 किलो सोने चोरीला गेले होते. दुकानदाराकडूनच चोरीच्या प्रमाणात खोटे सांगितले गेले होते, ही बाब पोलिसांनी गंभीरतेने घेतली आहे.
या कथेत सगळ्यात वेगळे व नाट्यमय वळण आले ते फारूखच्या पावभाजीच्या खाण्यामुळे. चोरीनंतर लगेच न पळता, फारूख जवळच्याच एका ठेल्यावर थांबून फक्त 30 रुपयांची पावभाजी खाण्यास गेला. त्याचे सीसीटीव्ही फुटेज जवळच्या दुकानांनी पोलिसांना दिले. महत्त्वाची बाब म्हणजे, त्याने पैसे फोन पेद्वारे भरले. याच डिजिटल व्यवहाराच्या माध्यमातून पोलिसांना त्याचा मोबाईल नंबर मिळाला आणि तिथून तपास सुस्पष्टपणे पुढे सरकला.
पोलिसांनी या गुन्ह्यातील सर्व आरोपींना अटक केली आणि 2.865 किलो सोने व 4.80 लाख रुपये रोख जप्त केले. चोरीला गेलेले सोने काही प्रमाणात वितळवण्यात आले होते. त्याचबरोबर, दुकानदार मारथुल्ला मलिक याच्यावरही पोलिसांनी चौकशी सुरू केली आहे; कारण त्याने सुरुवातीला चोरीच्या प्रमाणात माहिती लपवली होती.
कलबुर्गी पोलिस आयुक्त एस. डी. शरणप्पा यांच्या नेतृत्वाखालील विशेष पथकाने या गुन्ह्याचा छडा लावण्यात मोठे यश मिळवले.
