पुढारी ऑनलाईन डेस्क : बॉलिवूड अभिनेता अन् छोटे नवाब सैफ अली खान (Saif Ali Khan) त्याच्या चित्रपटांमुळे तसेच त्याच्या वैयक्तिक आयुष्यामुळे नेहमीच चर्चेत असतो. दरम्यान सैफ अली खानवर चाकू हल्ला झाला, त्यानंतर त्याला ताबडतोब रुग्णालयात दाखल करण्यात आले. खरंतर, गुरुवारी (दि.16) पहाटे 3 वाजता सैफ अली खान आणि करीना कपूर खानच्या वांद्रे येथील घरात एक मोठी घटना घडली. एका चोराने सैफ-करीनाच्या घरात घुसून चोरी करण्याचा प्रयत्न केला आणि अभिनेत्यावर चाकूने हल्लाही केला.
मिळालेल्या माहितीनुसार, गुरुवारी चोरीच्या संशयावरून एका अज्ञात व्यक्तीने वांद्रे (पश्चिम) येथील त्याच्या 11 व्या मजल्यावरील फ्लॅटमध्ये घुसून बॉलिवूड अभिनेता सैफ अली खानवर चाकूने वार केले. वांद्रे पोलिसांनी सांगितले की, खान जागे झाल्यावर आणि घुसखोराशी झटापट झाल्यानंतर अज्ञात व्यक्तीने त्याच्यावर हल्ला करून पळ काढला. 54 वर्षीय सैफ सध्या ऑपरेशन थिएटरमध्ये आहे. त्याच्यावर सहा वेळी चाकूने हल्ला झाल्याचे डॉक्टरांनी सांगितले आहे.
काल रात्री उशिरा एका अज्ञात व्यक्तीने अभिनेता सैफ अली खानच्या घरात घुसून त्याच्या मोलकरणीशी वाद घातला. जेव्हा अभिनेत्याने मध्यस्थी करून त्या माणसाला शांत करण्याचा प्रयत्न केला तेव्हा त्याने सैफ अली खानवर हल्ला करून त्याला जखमी केले. सैफ अली खानला चाकूने वार केल्यानंतर त्याला लीलावती रुग्णालयात दाखल करण्यात आले आहे. सैफ अली खानला जास्त दुखापत झालेली नाही. त्याच्या दुखापती गंभीर नाहीत. पोलिसांना या घटनेची माहिती मिळताच त्यांनी तातडीने प्रकरणाचा तपास सुरू केला. पोलिस आज घरात आणि जवळच्या कॅमेऱ्यांमध्ये असलेल्या सीसीटीव्ही फुटेजची देखील तपासणी करत आहेत. तर करीना कपूर खान आणि तिची दोन्ही मुले पूर्णपणे सुरक्षित आहेत.
या प्रकरणी सैफ अली खान आणि करीना कपूर खान यांनी अद्याप कोणतेही विधान केलेले नाही. पण प्रश्न असा आहे की सैफ-करीनाच्या घरात 24 तास सुरक्षा असते. छोटा नवाब त्याच्या कुटुंबासोबत राहतो, म्हणून तो त्यांच्या सुरक्षेची विशेष काळजी घेतो. घराबाहेर नेहमीच पहारेकरी असतात. सैफच्या अपार्टमेंटमध्ये पापाराझी देखील प्रवेश करू शकत नाहीत. मात्र हा चोर आतमध्ये घुसला कसा याची माहिती पोलिस घेत आहे. पोलिसांनी दिलेल्या प्राथमिक माहितीनुसार चोर हा रात्री अंधाराचा फायदा घेऊन पहारेकरांची नजर चुकवून घरामध्ये घुसला असल्याचे म्हटले आहे.
सैफ अली खानच्या अपार्टमेंटमध्ये प्रवेश करण्याची परवानगी नाही आणि आत जाणाऱ्यांची कसून तपासणी केली जाते. अशा परिस्थितीत, चोर घरात घुसला अशी मोठी चूक कुठून झाली? सैफ अली खानला त्याच्या गार्डना अनेकदा फटकारताना पाहिले गेले आहे, त्यामुळे ही एक मोठी चूक मानली जात आहे. तथापि, या प्रकरणातील अपडेट्सची अद्याप प्रतीक्षा आहे. पोलिसांनी या प्रकरणाचा सर्व प्रकारे तपास सुरू केला आहे.
