अमरावती : यवतमाळ शहरातील लोकनायक बापुजी अणे महिला महाविद्यालातील प्राध्यापकाने धामणगाव रेल्वे येथे मालगाडीखाली उडी घेवून जीवन संपवले. ही घटना सोमवार (दि.24) पहाटेच्या सुमारास घडली. प्रा. संतोष भास्करराव गोरे (वय 54 रा.यवतमाळ) असे मृताचे नाव आहे. ते इंग्रजी विषयाचे प्राध्यापक होते. काही दिवसांपूर्वी एका महिला प्राध्यापिकीने व्यवस्थापनाकडे सदर प्राध्यापकाची तक्रार दिली होती. या प्रकरणाची चौकशी होवून व्यवस्थापनाने प्राध्यापकाला क्लिन चिट दिल्याची माहिती सुत्रांनी दिली आहे. दरम्यान घटनास्थळावर चिठ्ठी सापडली असून, त्यामध्ये 30 ते 35 जणांची नावे असल्याची चर्चा आहे.
गेल्या काही दिवसापूर्वी प्रा. गोरे यांनी आपल्या पत्नीला पुणे येथे पाठविले होते. मागील काही दिवसांपासून ते नैराश्यात होते. दरम्यान आज सोमवारी पहाटे 3 वाजताच्या सुमारास धामणगाव रेल्वे येथे मालगाडी खाली येवून त्यांनी जीवन संपवले. हा प्रकार रेल्वे विभागाच्या कर्मचा-यांच्या लक्षात येताच त्यांनी चौकशी सुरु केली. आयकार्डच्या बेल्टवरुन मृतक यवतमाळ येथील अणे महाविद्यालातील कर्मचारी असल्याचे समोर आले. त्यावरून धामणगाव रेल्वे येथील कर्मचारी खसाळे यांनी महाविद्यालयात संपर्क साधून या घटनेची माहिती दिली. त्यांच्या मागे पत्नी, एक मुलगा व बराच मोठा आप्त परिवार आहे.
