वाशीम : शहरात भरदिवसा अज्ञात हल्लेखोरांनी एका तरूणाचा धारदार शस्राने हल्ला करून निर्घृण खून केला. ही घटना शहर पोलिस ठाण्याच्या पाठीमागे गुरूवारी (दि.२९) सायंकाळी ४.३० वाजता घडली. या घटनेमुळे शहरात भीतीचे वातावरण तयार झाले आहे. राहुल वाघ (वय २९) असे या तरूणाचे नाव आहे.
शहर पोलीस ठाण्यापासून हाकेच्या अंतरावरच राहुल वाघ या तरूणावर प्राणघातक हल्ला झाला. त्यानंतर हा तरूण जखमी अवस्थेत चालत येऊन एका हॉटेलजवळ कोसळला. या दरम्यान ५० फुटाचा रस्ता रक्ताने माखला होता. त्यानंतर स्थानिकांनी त्याला उपचारासाठी रुग्णालयात दाखल केले मात्र उपचारापुर्वीच त्याचा मृत्यू झाला. राहूल वाघ हा तरूण एका खाजगी दवाखान्यात काम करायचा, अशी माहिती समोर आली आहे. घटनेची माहिती मिळताच वाशिम पोलीस व फॉरेन्सिक पथक घटनास्थळी दाखल झाले असून या घटनेचा शहर पोलिस कसून तपास करीत आहेत.