नागपूर; पुढारी वृत्तसेवा : भाजप आमदारांकडे मंत्रिपदासाठी पैशांची मागणी करणारा निरजसिंग राठोड याला नागपूर गुन्हे शाखा पोलिसांनी गुजरातमध्ये अटक करून नागपुरात आणले. त्याला न्यायालयात हजर केलं जाणार आहे. आरोपीने अनेक आमदारांना गंडा असल्याचा संशय व्यक्त केला जात आहे. याचा तपास पोलीस करत आहेत.
नीरजसिंग राठोडने भारतीय जनता पक्षाचे अध्यक्ष जे.पी. नड्डा यांचा स्वीय सहायक असल्याचे सांगून मंत्रीपद मिळवून देण्यासाठी राज्यातील सहा आमदारांकडे त्याने पैशाची मागणी केली होती. यामध्ये नागपुरातील भाजपचे आमदार विकास कुंभारे, कामठीचे भाजप आमदार टेकचंद सावरकर यांना त्याने फोन केला होता. याचप्रकारे या आरोपीने देशभरातील अनेक आमदारांकडे पैसे मागितल्याची माहिती आहे. त्याच्यावर यापूर्वी देखील ४२० चा गुन्हा दाखल असल्याचे पोलिसांनी सांगितले. याशिवाय या आरोपीसोबत आणखी काही साथीदार असू शकतात तसेच आणखी काही आमदारांना त्याने फोन करून पैसे मागितल्याची शक्यता आहे. यामुळे पोलीस कोठडी दरम्यान पोलिसांच्या चौकशीत अधिक माहिती पुढे येईल अशी माहिती मनोज शिडाम, एसीपी, गुन्हे शाखा यांनी दिली. न्यायालयाने आज आरोपी नीरजसिंह राठोडला २२ पर्यंत पोलीस कोठडी सुनावली आहे.
