नागपूर - विदर्भात आज सर्वाधिक तापमान 46.8 अंश सेल्सियस वर्धा येथे त्या खालोखाल नागपूर 46.4अंश सेल्सियस अशी तापमानाची नोंद झाली. 25 मे पासून नवतपा सुरू झालेला असल्याने या काळात तापमान जुने विक्रम मोडणार का, अशी भीती व्यक्त होत आहे. नागपुरात आज सकाळपासून काहीसे ढगाळ वातावरण असताना आणि वादळी पावसाचा इशारा दिलेला असताना सूर्यकिरणांची दुपारची तीव्रता असह्य करणारी होती.
वाहतूक सिग्नलवर ग्रीन नेट, स्प्रिंकलर काहीसा दिलासा देत असले तरी अनेक जागी हिट ऍक्शन प्लॅन फारसा गांभीर्याने पाळला जाताना दिसत नसल्याच्या तक्रारी आहेत. उष्माघाताचे आणि विशेषतः रुग्णालयात दाखल होणारे रुग्ण गेल्या काही दिवसात उपराजधानीत मोठ्या प्रमाणात वाढले आहेत. यातून अनेकांचे मृत्यूही ओढवले. विदर्भात आजचे तापमान लक्षात घेता अकोला 45 अंश सेल्सिअस, अमरावती 45.2 अंश सेल्सियस, ब्रम्हपुरी 45.2, चंद्रपूर 45.4 अंश सेल्सिअस, गडचिरोली 45 अंश सेल्सिअस, गोंदिया 46.1, यवतमाळ 44.4 तर वाशिम येथे 44 अंश सेल्सिअस तापमानाची नोंद झाली.
