नागपूर : नागपूर जिल्ह्यातील उमरेड एमआयडीसी परिसरातील एमएमपी अल्युमिनियम फॉइल आणि पावडर तयार करणाऱ्या कंपनीत शुक्रवारी रात्री स्फोटानंतर भीषण आगीच्या घटनेत आतापर्यंत ५ कामगारांचा मृत्यू झाला. यात दोघांचा नागपुरातील मेडिकल रुग्णालयात उपचारादरम्यान मृत्यू झाला, तर दोन कामगारांचे मृतदेह सापडले. अद्याप एकाचा शोध लागलेला नाही. आग धुमसत असल्याने तपासात अडचणी येत आहेत.
ही घटना घडली तेव्हा एकंदर दीडशे कामगार कामावर असल्याने अद्यापही थांगपत्ता न लागल्याने एकजण अडकल्याची भीती व्यक्त होत आहे. काही कामगार जीवाच्या आकांताने बाहेर पडल्याने सुदैवाने बचावले. ११ कामगार गंभीर जखमी झाले, यापैकी दोघांची प्रकृती गंभीर होती त्यांचा मृत्यू झाला. या कंपनीचे नाव एमएमपी असे असून रात्री सातच्या सुमारास स्फोटानंतर ही आग लागली. नागपूर, उमरेड येथून अग्निशमन यंत्रणा कामाला लागली असली तरी पहाटेपर्यंत ही आग सर्वत्र केमिकल असल्याने धुमसत होती. जिल्हाधिकारी डॉ. विपिन इटनकर आणि जिल्हा पोलिस अधीक्षक हर्ष पोद्दार यांच्यासह वरिष्ठ अधिकारी, फॉरेन्सिक टीम घटनास्थळी दाखल झाली. या घटनेमागचे कारण शोधण्याचा प्रयत्न केला जात आहे. जखमींना नागपुरातील मेडिकल कॉलेज शासकीय रुग्णालयात उपचारासाठी आणण्यात आले आहे. महत्वाचे म्हणजे या कंपनीमध्ये अल्युमिनियम पावडर असल्याने ही आग लगेच विझवता येत नाही. पावडर जळून खाक झाल्यानंतरच ही आग आटोक्यात येईल, अशी माहिती पोलीस आणि अग्निशमनच्या अधिकाऱ्यांनी दिली.
