नागपूर: अयोध्येतील श्री राम मंदिर दान पेटीतील कथित चोरीच्या प्रकरणाविरोधात शिवसेना (उद्धव बाळासाहेब ठाकरे) पक्षाने पुकारलेल्या राज्यव्यापी आंदोलनाचा दुसरा टप्पा येत्या १८ जुलैपासून सुरू होत आहे. विशेष म्हणजे, हे आंदोलन उपमुख्यमंत्री देवेंद्र फडणवीस यांच्या गृहशहरातून, म्हणजेच नागपुरातून सुरू होणार असून, यात पक्षप्रमुख उद्धव ठाकरे आणि युवा नेते आदित्य ठाकरे स्वतः सहभागी होणार आहेत. या आंदोलनाची घोषणा खासदार संजय राऊत यांनी केली आहे.
सर्वोच्च न्यायालयाच्या देखरेखीखाली चौकशीची मागणी
कोट्यवधी हिंदूंचे श्रद्धास्थान असलेल्या श्री राम मंदिरात भाविकांनी अर्पण केलेल्या दानाची लूट अद्यापही सुरू असून, या प्रकरणातील मुख्य आरोपी मोकाट असल्याचा आरोप शिवसेनेकडून करण्यात आला आहे. या संपूर्ण प्रकरणाची सर्वोच्च न्यायालयाच्या अधिपत्याखाली सखोल चौकशी व्हावी, अशी आग्रही मागणी आदित्य ठाकरे यांनी केली आहे.
या आंदोलनासाठी नागपूरसह संपूर्ण विदर्भातील पदाधिकाऱ्यांना उपस्थित राहण्याचे आवाहन करण्यात आले आहे. भाजपचा बालेकिल्ला असलेल्या नागपुरात शिवसेनेच्या या आंदोलनाकडे आणि त्यानिमित्ताने होणाऱ्या शक्तिप्रदर्शनाकडे राजकीय वर्तुळाचे विशेष लक्ष लागले आहे.
