Nagpur Bhishi Fraud
नागपूर : मोठी भिशी चालवून आकर्षक नफा मिळवून देण्याचे आमिष दाखवत तिघांकडून तब्बल १६ लाख ५५ हजार ८०० रुपये उकळून फसवणूक केल्याचा प्रकार उत्तर नागपुरातील नारी रोड परिसरात समोर आला आहे. भिशीची मुदत पूर्ण झाल्यानंतरही आरोपीने नफा अथवा जमा केलेली मूळ रक्कम परत न केल्याने अखेर तिघांनी कपिलनगर पोलिसांकडे तक्रार दाखल केली. तक्रारीवरून पोलिसांनी आरोपीविरुद्ध गुन्हा दाखल करून तपास सुरू केला आहे.
पोलिसांनी दिलेल्या माहितीनुसार, मानेवाडा येथील किरण नारायण देवगडे (३२) यांची एका मित्रामार्फत नारी रोड परिसरातील गुरुप्रीतसिंह मनजीतसिंह वाडे याच्याशी ओळख झाली. आरोपीने आपण मोठी भिशी चालवत असल्याचे सांगत किरण देवगडे आणि त्यांच्या मित्रांना पैसे गुंतविण्यास प्रवृत्त केले.
त्यानंतर नारी रोडवरील ‘मोगा मोटर्स’ कार्यालयात १३ जुलै २०२४ ते १६ डिसेंबर २०२५ या कालावधीत तिघांनी वेगवेगळ्या रकमा जमा केल्या. तक्रारीनुसार, किरण देवगडे यांच्याकडून ५ लाख ५६ हजार रुपये, नीरज यांच्याकडून ८ लाख ४९ हजार ८०० रुपये, तर प्रशांत गावंडे यांच्याकडून २ लाख ५० हजार रुपये घेण्यात आले. अशाप्रकारे तिघांकडून एकूण १६ लाख ५५ हजार ८०० रुपये जमा करण्यात आले.
भिशीची ठरलेली मुदत पूर्ण झाल्यानंतर तिघांनी आरोपीकडे जमा केलेली रक्कम तसेच ठरल्याप्रमाणे नफ्याची मागणी केली. मात्र, आरोपीकडून पैसे देण्यास टाळाटाळ करण्यात आल्याचा आरोप आहे. वारंवार मागणी करूनही नफा तर मिळालाच नाही, शिवाय जमा केलेली मूळ रक्कमही परत करण्यात आली नाही.
अखेर आपली फसवणूक झाल्याचे लक्षात आल्यानंतर तिघांनी कपिलनगर पोलीस ठाणे गाठून तक्रार दाखल केली. तक्रारीच्या आधारे पोलिसांनी गुरुप्रीतसिंह वाडे याच्याविरुद्ध भारतीय न्याय संहितेच्या कलम ३१८(४) अंतर्गत गुन्हा दाखल केला आहे.
दरम्यान, आरोपीने आणखी काही नागरिकांकडून अशाच पद्धतीने पैसे उकळले आहेत का, याचा तपास पोलिसांकडून सुरू आहे. तसेच भिशीशी संबंधित कागदपत्रे, आर्थिक व्यवहार आणि जमा झालेल्या रकमेच्या व्यवहारांचीही चौकशी केली जात आहे.
