नागपूर : राज्यातील पोलीस पाटील यांच्या प्रलंबित ४ महिन्यांच्या मानधनाचा विषय मार्गी लावण्यासाठी येत्या २ सप्टेंबर रोजी शासन निर्णय निर्गमीत करण्यात येईल, अशी ग्वाही उपमुख्यमंत्री देर्वेद्र फडणवीस यांनी शनिवारी (दि.31) दिली. तसेच सेवानिवृत्तीचे वय ६५ वर्षे करण्याच्या मागणीबाबतही राज्य शासन सकारात्मक निर्णय घेईल, असेही त्यांनी स्पष्ट केले.
हनुमान नगरातील डॉ. ईश्वर देशमुख क्रीडा महाविद्यालयाच्या मैदानावर आयोजित 'महाराष्ट्र राज्य गावकामगार पोलीस पाटील संघाच्या ८ व्या राज्यस्तरीय अधिवेशनाचे प्रमुख अतिथी म्हणून उपमुख्यमंत्री फडणवीस बोलत होते. आमदार सर्वश्री चंद्रशेखर बावनकुळे, प्रवीण दटके, परिणय फुके, नागपूर परिक्षेत्राचे विशेष पोलीस महानिरीक्षक दिलीप पाटील भुजबळ,महाराष्ट्र राज्य गावकामगार पोलीस पाटील संघांचे अध्यक्ष बाळासाहेब शिंदे-पाटील, कार्याध्यक्ष परशुराम पाटील आदी यावेळी उपस्थित होते.उपमुख्यमंत्री म्हणाले,पोलीस पाटील हे गावाचे गृहमंत्री असतात कायदा सुव्यवस्थेसह या संरचनेत आता महिला सुरक्षा हा महत्वाचे कर्तव्य आहे. राज्य शासनाने या पदाला मान व मानधन मिळावा म्हणून वाढीव १५ हजार रुपये मानधन दिले. थकीत मानधन लक्षात घेता या कार्यक्रमातच फडणवीस यांनी गृह विभागाच्या अपर सचिवांना दूरध्वनीवरुन सूचना केल्या.
पोलीस पाटलांना सेवानिवृत्तीनंतर मानधन देण्याबाबत, महात्मा फुले जन आरोग्य योजनेअंतर्गत सर्व प्रकारचे उपचार मिळण्याबाबत प्रयत्न करणार असल्याची ग्वाही त्यांनी दिली. पोलीस पाटलांचा पोलीस विभाग व महसुली अधिकाऱ्यांकडून अपमान होणार नाही त्यांना सन्मान मिळेल अशी कार्यप्रणाली (एसओपी) तयार करण्यात येईल असेही त्यांनी सांगितले.
