नागपूर : राज्यातील प्राध्यापक पदोन्नती आणि कॅश-बेनिफिट प्रक्रियेबाबत युजीसीच्या सुधारित मार्गदर्शक तत्त्वांनुसार गती देण्यात आली असून, याचा पात्र प्राध्यापकांना लाभ मिळेल, अशी ग्वाही उच्च तंत्र शिक्षण मंत्री चंद्रकांत पाटील यांनी मंगळवारी विधान परिषदेत दिली. स्कॉलरशिपचे अनुदान आता वेतन या बाबीमध्ये देण्यात येणार असल्याने विद्यार्थ्यांना स्कॉलरशिप वेळेत मिळेल. तसेच, भविष्यात शिक्षकेतर पदे भरण्यात येतील, असेही पाटील म्हणाले.
सदस्य जयंत आसगावकर यांनी मांडलेल्या लक्षवेधी सुचनेला उत्तर देताना ते बोलत होते. पाटील म्हणाले, युजीसीच्या सुधारित मार्गदर्शक तत्त्वांनुसार पदोन्नती आणि कॅश-बेनिफिट संदर्भातील कार्यवाही केली जात आहे. या संदर्भातील माहिती विद्यापीठे आणि महाविद्यालयांकडून मागविण्यात आली आहे. यासाठी आवश्यक असणारा निधी शासनाकडून उपलब्ध होईल. विद्यार्थ्यांना उच्च दर्जाचे शिक्षण मिळण्यासाठी प्राध्यापक भरती प्रक्रिया गतीने राबविण्यात येणार आहे.
युनिव्हर्सिटी कॅम्पसमध्ये 750 प्राध्यापक आणि सीनिअर महाविद्यालयांमध्ये सुमारे 5500 प्राध्यापक पदांची भरती केली जाणार आहे. तासिका तत्वावरील प्राध्यापकांच्या मानधनात वाढ केली असून, विद्यापीठांना स्वनिधीतून ठोक 50 हजार वेतनावर प्राध्यापक घेण्यास अनुमती दिली आहे, असेही त्यांनी स्पष्ट केले.
