नागपूर : पुढारी ऑनलाईन
38 प्रभागातील 151 नगरसेवकांसाठी होणाऱ्या मनपा निवडणुकीच्या मतमोजणीसाठी शहरातील दहाही झोन, मतमोजणी केंद्र सज्ज झाले आहेत. 3004 मतदान केंद्रावरून ईव्हीएम रात्री उशिरा पोहचल्या. 4009 कंट्रोल युनिट आणि दहा हजार 928 बॅलेट युनिटची मदत घेण्यात आली. 16 जानेवारी रोजी सकाळी दहा वाजता मतमोजणी सुरू होईल.
प्रत्येक निवडणूक निर्णयाधिकारी यांचेकडे 20 टेबल ईव्हीएमसाठी तर पोस्टल, बॅलेटसाठी चार टेबल असणार आहेत. प्रत्येक टेबलवर एक मतमोजणी पर्यवेक्षक, एक सहाय्यक नियुक्त करण्यात आलेले आहेत.
सर्व प्रभागांची एकावेळी मतमोजणी सुरू होणार असल्याने पहिला निकाल साधारणतः एक वाजेपर्यंत अपेक्षित आहे. एकाच वेळी पोस्टल आणि ईव्हीएमची मतमोजणी केली जाणार आहे. पोलीस बंदोबस्त आणि निवडणूक अधिकारी कर्मचारी असे 16 हजारांवर मनुष्यबळ यासाठी लागणार आहे.
