Nagpur Municipal Corporation alliance
नागपूर: नागपूर महानगरपालिकेतील बहुमतातील भाजपचा वर्षानुवर्षे सुरू असलेला मनमानी कारभार आणि जनविरोधी धोरणांविरोधात निर्णायक संघर्ष छेडण्याच्या ठाम भूमिकेतून, शिवसेना (उद्धव बाळासाहेब ठाकरे) गटाने मंगळवारी (दि.३) काँग्रेसच्या नेतृत्वाखालील ‘नागपूर महाविकास आघाडीत सहभागी होण्याचा निर्णय घेतला.
निवडणूकपूर्व दोन्ही पक्ष स्वतंत्र लढले. आता काँग्रेसच्या गटाचे संख्याबळ 34 वरून 36 झाले. लवकरच ते 40 होण्याचा विश्वास व्यक्त होत आहे. या राजकीय घडामोडीमुळे महानगरपालिकेतील विरोधकांना आता बळ मिळणार आहे.
याविषयीचा निर्णय शहर काँग्रेस अध्यक्ष आमदार विकास ठाकरे यांच्या पुढाकाराने झालेल्या संयुक्त बैठकीत घेण्यात आला. बैठकीस मनपा नागपूर महाविकास आघाडी गटनेते संजय महाकाळकर, आणि शिवसेना उबाठा गटनेते किशोर कुमेरिया उपस्थित होते.
यानंतर दोन्ही गटांच्या नेत्यांनी विजयलक्ष्मी बिदरी, विभागीय आयुक्त, यांची भेट घेऊन सर्व कायदेशीर व प्रशासकीय प्रक्रिया पूर्ण केल्या. यानंतर फेरीवाल्यांवरील अन्यायाविरोधात काँग्रेस नगरसेवकांचे मनपा मुख्यालयासमोर आज मंगळवारी पहिले निर्णायक आंदोलन झाले. सदस्य संख्येनुसार स्वीकृत सदस्य आणि विविध समित्यांमधील वाटा काँग्रेसच्या नेतृत्वाखालील या गटाला मिळणार आहे.
