नागपूर, : नागपूर एमआयडीसी पोलीस ठाण्याच्या हद्दीत दाखल झालेल्या अल्पवयीन मुलाच्या अपहरण व खून प्रकरणाचा तपास अवघ्या ११ दिवसांत पूर्ण करून सक्षम दोषारोपपत्र न्यायालयात दाखल करण्यात पोलिसांना यश आले होते. या प्रकरणात प्रत्यक्ष पुरावा उपलब्ध नसतानाही परिस्थितीजन्य, तांत्रिक आणि वैज्ञानिक पुराव्यांच्या आधारे तपासाची सांगड घालत पोलिसांनी आरोपीविरुद्ध भक्कम दोषारोपपत्र सादर केले. या प्रकरणात न्यायालयाने आरोपीला दुहेरी जन्मठेपेची शिक्षा सुनावली. या उल्लेखनीय तपासाची दखल घेत महाराष्ट्रातील सन २०२३च्या ‘Best Conviction’ (सर्वोत्कृष्ट दोषसिद्धी) पुरस्कारासाठी या गुन्ह्याची निवड झाली होती.
एमआयडीसी पोलीस ठाण्यात गुन्हा क्रमांक ३०७/२०२१, भारतीय दंड संहितेच्या कलम ३६४(अ) आणि ३०२ अन्वये अल्पवयीन मुलाचे अपहरण करून खून केल्याचा गुन्हा दाखल करण्यात आला होता. प्रकरणाचा तपास करताना पोलिसांसमोर प्रत्यक्ष पुराव्याचे मोठे आव्हान होते. मात्र, तपास पथकाने परिस्थितीजन्य पुरावे, तांत्रिक माहिती आणि वैज्ञानिक पुरावे यांचा बारकाईने अभ्यास करून आरोपीविरुद्ध सक्षम पुरावे संकलित केले.
तपास पूर्ण करून अवघ्या ११ दिवसांत दोषारोपपत्र न्यायालयात दाखल करण्यात आले. त्यानंतर न्यायालयीन प्रक्रियेत पोलिसांनी सादर केलेल्या पुराव्यांच्या आधारे आरोपी दोषी ठरला आणि त्याला दुहेरी जन्मठेपेची शिक्षा सुनावण्यात आली.
या प्रकरणातील तपास आणि न्यायालयीन दोषसिद्धीची दखल घेत सन २०२३ मध्ये महाराष्ट्रातील ‘Best Conviction’ अर्थात सर्वोत्कृष्ट दोषसिद्धी पुरस्कारासाठी हा गुन्हा पात्र ठरला होता. प्रत्यक्ष पुरावा नसतानाही आधुनिक तपास पद्धतींच्या आधारे आरोपीला शिक्षा मिळवून देण्यात पोलिसांना यश आल्याने या प्रकरणाला विशेष महत्त्व प्राप्त झाले.
या उल्लेखनीय कामगिरीबद्दल २५ ऑगस्ट २०२६ रोजी पोलीस महासंचालकांचे प्रशस्तीपत्र प्रदान करण्यात आले. गुन्हे अन्वेषण विभाग, पुणे येथे आयोजित कार्यक्रमात पोलीस महानिरीक्षक सुनील फुलारी यांच्या हस्ते एमआयडीसी पोलीस ठाण्याचे पोलीस निरीक्षक दिनेश लबडे तसेच गुन्हे शाखा, नागपूर येथील पोलीस अंमलदार क्र. १४०३२ दीपक दासरवार यांचा प्रशस्तीपत्र देऊन गौरव करण्यात आला.
