Nagpur Medical College Escape Case
नागपूर : नागपुरातील मध्यवर्ती कारागृहात असलेल्या एका बंदिवानाने उपचारासाठी दाखल असताना मेडिकल शासकीय वैद्यकीय महाविद्यालयातून पलायन केल्याची घटना रविवारी घडली होती. आज (दि.१९) त्याला अजनी पोलिसांनी ताब्यात घेतल्याची माहिती आहे. दोन पथके त्याच्या मागावर होती.
पहाटे दोनच्या सुमारास मेडिकलची वैद्यकीय आणि सुरक्षा यंत्रणेला गुंगारा देत पसार झालेल्या या आरोपीचे नाव हर्ष महेंद्र रामटेके (वय 23, रा. खापरी, मूळ गाव भंडारा) असून तो घरफोडी व इतर असे 6 गुन्हे त्याच्यावर दाखल असल्याची माहिती मिळाली. न्यायालयीन कोठडीमुळे कारागृहात असलेल्या या कैद्याच्या डोक्याला मार लागल्याने मेडिकल हॉस्पिटल वार्ड क्रमांक 36 येथे तो उपचारासाठी दाखल होता.
मात्र, मध्यरात्रीच्या वेळी कुणालाही शंका न येता वॉर्डातून बाहेर पडत, सुरक्षा रक्षक समोर असताना, तो मोबाईल बघण्यात गुंतलेला असताना त्याने लोखंडी दार उघडून सहज पोबारा केल्याचे सीसीटीव्हीत दिसत आहे. सोशल मीडियावर हे व्हिडिओ व्हायरल होताच कारागृह, मेडिकल रुग्णालय आणि पोलिस यंत्रणेच्या सुरक्षा व्यवस्थेवर प्रश्नचिन्ह निर्माण झाले.
