नागपूर : मुख्यमंत्री देवेंद्र फडणवीस यांच्या संकल्पनेतून आदिवासी समाजाची संस्कृती जगासमोर यावी, यासाठी सुराबर्डी येथे भव्य गोंडवाना आदिवासी सांस्कृतिक संग्रहालय उभारले जाणार आहे. सुमारे १५ एकर जागेवर हे संग्रहालय उभारले जाणार असून या प्रकल्पाचा सादरीकरणाद्वारे आदिवासी विकास मंत्री अशोक उईके यांनी रविवारी (दि.२०) आढावा घेतला.
जूनपासून या कामाची प्रत्यक्ष सुरुवात होण्याची शक्यता आहे. विविध ४५ आदिवासी जातींचे सांस्कृतिक, सामाजिक आणि पारंपरिक पैलू संग्रहालयात प्रदर्शित करण्यात येणार आहेत. हे संग्रहालय भविष्यातील पिढ्यांना आदिवासी संस्कृतीचा वारसा समजून घेण्यासाठी आणि जतन करण्यासाठी प्रेरणा देणारे ठरेल. गोंड, भिल्ल, कोलाम, कोरकू, वारली, महादेव कोळी, कातकरी, पारधी यासह विविध आदिवासी जातींचे सांस्कृतिक महत्त्व या संग्रहालयात अधोरेखित करण्यात येणार आहे. समाज बांधवांनी स्वातंत्र्यसंग्रामात दिलेले योगदान, इतिहास, प्रथा आणि परंपरा, नृत्य, संगीत, कला, दागिने अशी वैशिष्ट्ये या संग्रहालयात अधोरेखित करण्यात येणार आहेत. संग्रहालय पर्यावरणपूरक करण्यावर भर देण्यात येणार आहे. सादरीकरणावेळी आदिवासी विकास विभागाच्या अपर आयुक्त आयुषी सिंग, आदिवासी विकास विभागाचे कार्यकारी अभियंता उज्वल डाबे, सहआयुक्त बबिता गिरी, प्रकल्प अधिकारी नितीन इसोकार आदी वरिष्ठ अधिकारी उपस्थित होते.
