गोंदिया : ग्राम मरामजोब येथील अकरावीत शिकत असलेली विद्यार्थिनी घरामध्ये चुलीजवळ बसून अभ्यास करताना, लागलेल्या आगीत गंभीर जखमी झालेली होती. ही घटना शुक्रवारी (दि.२७) पहाटे घडली होती. चांदणी किशोर शहारे (वय १७) असे त्या विद्यार्थिनीचे नाव आहे.
मिळालेल्या माहितीनुसार, चांदणी शहारे ही विद्यार्थिनी मुरदोली येथील शिवराम महाविद्यालयात अकराव्या वर्गामध्ये शिकत होती. हिवाळ्याचे दिवस असल्यामुळे थंडीपासून बचाव करण्याकरिता नेहमीप्रमाणे पहाटेच्या दरम्यान घरच्या चुलीजवळ ती अभ्यास करीत होती. अचानक लागलेल्या आगीत सदर विद्यार्थिनी पूर्णतः जळाली. गंभीर अवस्थेत असलेल्या मुलीला ग्रामीण रुग्णालय देवरी येथे दाखल करण्यात आले. परंतु स्थिती गंभीर असल्यामुळे तिला गोंदियाला हलविण्यात आले. गोंदिया वरून तिला नागपूरला नेण्यात आले. मात्र उपचारादरम्यान चांदनी शहारे या विद्यार्थिनीचा मृत्यू झाला. तिच्या मृत्यूमुळे गावात हळहळ व्यक्त केल्या जात आहे.
